വരാനിരിക്കുന്ന ടോക്കിയോ ഓട്ടോ സലൂൺ 2024 ൽ സുസുക്കി ഒമ്പത് വാഹനങ്ങൾ അവതരിപ്പിക്കുമെന്നാണ് റിപ്പോര്ട്ടുകൾ. ഈ വാഹനങ്ങളിലൊന്നാണ് സുസുക്കി സ്പേഷ്യ കിച്ചൺ കൺസെപ്റ്റ്. മാതാപിതാക്കൾക്കും കുട്ടികൾക്കും ഒരുമിച്ച് യാത്ര ചെയ്യാനും പാചകം ചെയ്യാനും കഴിയുന്ന തരത്തിലാണ് ഈ പ്രത്യേക വേരിയന്റ് രൂപകൽപ്പന ചെയ്യുക. ക്യാമ്പിംഗ് ആസ്വദിക്കുന്ന കുടുംബങ്ങളെ ഉദ്ദേശിച്ചാണ് കമ്പനി ഇത്തരത്തിലൊരു കൺസെപ്റ്റ് അവതരിപ്പിക്കുന്നത്. പിൻ സീറ്റുകൾക്കും ലഗേജ് കംപാർട്ട്മെന്റിനും ഇടയിൽ സ്ഥിതി ചെയ്യുന്ന കിച്ചൻ സ്പേസോടുകൂടിയ സ്പേഷ്യയെയാണ് സുസുക്കി വാഗ്ദാനം ചെയ്യുന്നത്. ഒരു സെറ്റ് പിൻ സീറ്റുകളുള്ള ഒരു യൂട്ടിലിറ്റി വാഹനമാണ് സ്റ്റാൻഡേർഡ് സ്പേഷ്യ.
റിയർ ആംറെസ്റ്റ്, ലഗേജ് സപ്പോർട്ട്, ലെഗ് സപ്പോർട്ട് എന്നിവയും നിർമ്മാതാവ് വാഗ്ദാനം ചെയ്യുന്നു. പിന്നിലെ സൺഷെയ്ഡ്, സീറ്റ് വാമർ, ഹീറ്റർ ഡക്റ്റ്, യുവി ഗ്ലാസ്, പവർ സ്ലൈഡിംഗ് റിയർ ഡോർ എന്നിവയും ഇതിലുണ്ടാവും. സ്പേഷ്യ കിച്ചൺ കൺസെപ്റ്റിന് പുറമെ മൗണ്ട് ട്രെയിൽ’ കൺസെപ്റ്റും സുസുക്കി പ്രദർശിപ്പിക്കും. ഇത് കൂടാതെ സ്വിഫ്റ്റ് കൂൾ യെല്ലോ റെവ് കൺസെപ്റ്റും ഓട്ടോ സലൂണിന്റെ ഭാഗമാകും. ബ്ലാക്ക് റൂഫും ഡെക്കലുകളുമുള്ള കൂൾ യെല്ലോ മെറ്റാലിക് നിറത്തിലാണ് ഈ കൺസെപ്റ്റ് പൂർത്തിയാക്കിയിരിക്കുന്നത്. ‘ഫോർത്ത് ജനറേഷൻ സ്വിഫ്റ്റ്’ എന്ന് പറയുന്ന പുതിയ ഗ്രാഫിക്സ് സൈഡിൽ ഉണ്ട്.
