തിരുവനന്തപുരം : സ്വര്ണക്കടത്തുകേസിലെ മുഖ്യപ്രതി സ്വപ്ന സുരേഷിന് സംരക്ഷണം നല്കാനാവില്ലെന്ന് വ്യക്തമാക്കി എന്ഫോഴ്മെന്റ് ഡയറക്ടറേറ്റ് (ഇ.ഡി). സുരക്ഷ നല്കാനുള്ള സംവിധാനം ഇ.ഡിക്കില്ല. സുരക്ഷക്കായി ഇ.ഡി സംസ്ഥാന പോലീസിനെയാണ് സമീപിക്കുന്നത്. കേന്ദ്രം കേസില് കക്ഷിയല്ലാത്തതിനാല് കേന്ദ്രസുരക്ഷ നല്കാനാവില്ലെന്നും ഇ.ഡി സത്യവാങ്മൂലത്തില് വ്യക്തമാക്കി. എറണാകുളം ജില്ല കോടതിയില് സമര്പ്പിച്ച സത്യവാങ്മൂലത്തിനാണ് ഇ.ഡിയുടെ മറുപടി. അതേസമയം, കേസില് കേന്ദ്രസര്ക്കാരിനെ കക്ഷി ചേര്ക്കാന് പ്രത്യേക അപേക്ഷ നല്കുമെന്ന് സ്വപ്നയുടെ അഭിഭാഷകന് അറിയിച്ചു.
നേരത്തെ കോടതിയില് മൊഴി നല്കിയതിന് പിന്നാലെ സ്വപ്ന സുരേഷിന്റെ പാലക്കാട്ടെ ഫ്ലാറ്റിന് പോലീസ് സുരക്ഷ ഏര്പ്പെടുത്തിയിരുന്നു. ഇതിനുപിന്നാലെയാണ് പോലീസ് സുരക്ഷ ആവശ്യമില്ലെന്നും പകരം ഇ.ഡി സുരക്ഷ ഒരുക്കണമെന്നും ആവശ്യപ്പെട്ട് സ്വപ്നയുടെ അഭിഭാഷകന് കോടതിയെ സമീപിച്ചത്. താമസിക്കുന്നയിടത്ത് അടക്കം തന്നെ കേരള പോലീസ് നിരീക്ഷിക്കുകയാണെന്നും പോലീസിനെ പിന്വലിക്കണമെന്നുമായിരുന്നു ആവശ്യം.
