തിരുവനന്തപുരം : തിരുവനന്തപുരം പിരപ്പന്‍കോട് രാജ്യാന്തര നീന്തല്‍ പരിശീലന കേന്ദ്രത്തില്‍ നിന്ന് റാഗിങ് നേരിടേണ്ടി വന്നതായി പരാതി. ഏഴാം ക്ലാസ് വിദ്യാര്‍ത്ഥിനിയാണ് പരിശീലന കേന്ദ്രത്തില്‍ ക്രൂരമായ റാഗിങിന് ഇരയായത്. വിദ്യാര്‍ത്ഥിനി പഠനം ഉപേക്ഷിച്ചതായി കുട്ടിയുടെ അമ്മ പരാതിയില്‍ പറയുന്നു. സംഭവത്തില്‍ പരാതിയുമായി അധികാരികളെ സമീപിച്ചിട്ടും നടപടിയുണ്ടായില്ലെന്ന് വിദ്യാര്‍ത്ഥിനിയുടെ അമ്മ ആരോപിച്ചു. ഹോസ്റ്റലില്‍ നടക്കുന്ന മറ്റ് കാര്യങ്ങള്‍ മകള്‍ അറിയിച്ചിരുന്നുവെന്നും ഇത് മനസിലാക്കിയ മറ്റ് വിദ്യാര്‍ത്ഥികളും ഹോസ്റ്റല്‍ വാര്‍ഡനും മകളെ മാനസിക പീഡനത്തിനിരയാക്കുകയായിരുന്നുവെന്ന് കുട്ടിയുടെ അമ്മ ആരോപിച്ചു. സീനിയര്‍ വിദ്യാര്‍ത്ഥികള്‍ നിര്‍ബന്ധിച്ച്‌ ഫോണ്‍ കൈക്കലാക്കാന്‍ ശ്രമിക്കുന്നതിനിടെയാണ് കുട്ടി ബോധരഹിതയായി വീണതെന്ന് അമ്മ ആരോപിച്ചു. ദേശീയതലത്തില്‍ നീന്തല്‍ മത്സരങ്ങളില്‍ പങ്കെടുക്കണമെന്ന് ആഗ്രഹിച്ചാണ് പരിശീലന കേന്ദ്രത്തിലെത്തിയതെന്നും ആ സ്വപ്‌നമാണ് റാഗിങിലൂടെ തല്ലി തകര്‍ത്തതെന്നും 12 കാരി ആരോപിച്ചു.
