പള്ളിക്കൽ : സ്വയം തൊഴിൽ പരിശീലനങ്ങളിലൂടെ വരുമാന സാദ്ധ്യതകൾക്ക് വഴിയൊരുക്കുക എന്ന ലക്ഷ്യത്തോടെ കൈതയ്ക്കൽ ബ്രദേഴ്സ് ഗ്രന്ഥശാല ആൻഡ് സാംസ്കാരിക കേന്ദ്രം വനിതാവേദി പത്തനംതിട്ട ജൻ ശിക്ഷൻ സൻസ്തനുമായി ചേർന്ന് സംഘടിപ്പിച്ച മൂന്നു മാസത്തെ തയ്യൽ പരിശീലനം നെയ്തെടുക്കാം ജീവിതവിജയങ്ങൾ സമാപിച്ചു. തയ്യൽ മേഖലയിൽ പരിജ്ഞാനം ഉള്ളവർക്ക് കൂടുതൽ ശാസ്ത്രീയമായ പരിശീലനം നൽകി മെച്ചപ്പെട്ട സ്വയംതൊഴിൽ സാദ്ധ്യതകൾക്ക് അവസരമൊരുക്കുന്നതിനായാണ് പരിശീലന പരിപാടി സംഘടിപ്പിച്ചത്.
വിജയകരമായി പരിശീലനം പൂർത്തിയാക്കിയവർക്കുള്ള സർട്ടിഫിക്കറ്റ് വിതരണം നടന്നു. പരിപാടിയുടെ ഭാഗമായി വേൾഡ് കൗൺസിലിന്റെയും കെയർ ആൻഡ് സേഫിന്റെയും നേതൃത്വത്തിൽ സ്ത്രീകളിൽ വർദ്ധിച്ചു വരുന്ന ഗർഭാശയ ക്യാൻസറിനെ കുറിച്ചുള്ള ബോധവത്കരണ ക്ലാസും നടന്നു. ജെ.എസ്.എസ് ഡയറക്ടർ അമൃത സർട്ടിഫിക്കറ്റുകൾ വിതരണം ചെയ്തു. ബ്രദേഴ്സ് സെക്രട്ടറി ജയകുമാർ പി.അദ്ധ്യക്ഷത വഹിച്ചു. ശശികുമാർ കെ.എൻ, സുദീപ് എസ് എന്നിവർ ആരോഗ്യബോധവത്രകണ ക്ലാസ് നയിച്ചു. വിമൽ കൈതയ്ക്കൽ, മായ, രാജി.ജെ, റ്റി, ചിന്നു വിജയൻ, രമ്യ പ്രശാന്ത്, ദർശന സന്തോഷ് എന്നിവർ സംസാരിച്ചു.
