മുംബൈ: ബോംബ് ഭീഷണിയെ തുടര്ന്ന് മുംബൈയിലെ താജ് ഹോട്ടലും പരിസരവും കനത്ത പോലീസ് സുരക്ഷയില്. താജ് കൊളാബ, ബാന്ദ്രയിലുള്ള താജ് ലാന്ഡ്സ് എന്ഡ് എന്നീ ഹോട്ടലുകള്ക്ക് നേരെ അര്ദ്ധരാത്രിയോടെയാണ് ഫോണ്വഴി ഭീഷണിയുണ്ടായത്. പാക്കിസ്ഥാനിലെ കറാച്ചിയിലെ നമ്പറില് നിന്നാണ് കോള് വന്നതെന്നും വിളിച്ചയാള് ലഷ്കര്-ഇ-ത്വയ്ബ അംഗമാണെന്ന് സ്വയം പരിചയപ്പെടുത്തിയതായും അധികൃതര് പറഞ്ഞു.
ഭീഷണിയെതുടര്ന്ന് ഹോട്ടല് താജിന് ചുറ്റും ശക്തമായ നിരീക്ഷണമാണ് മുംബൈ പോലീസ് ഏര്പ്പെടുത്തിയത്. ഹോട്ടലിലേക്ക് വരുന്ന എല്ലാവരെയും പ്രത്യേകം നിരീക്ഷിക്കുന്നുണ്ട്. കൂടാതെ തീരപ്രദേശങ്ങളിലും റോഡുകളിലും പട്രോളിങ് വര്ദ്ധിപ്പിച്ചിട്ടുണ്ട്. 2008 നവംബര് 26 ന് മുംബൈയിലെ താജ് ഹോട്ടലിന് നേരെ തീവ്രവാദി ആക്രമണം നടന്നപ്പോള് 166 ല് അധികം ആളുകള് കൊല്ലപ്പെടുകയും മുന്നൂറിലധികം പേര്ക്ക് പരിക്കേല്ക്കുകയും ചെയ്തിരുന്നു.
