ചെന്നൈ : തമിഴ്നാട്ടിൽ സർക്കാർ രൂപീകരണത്തിനായി സിപിഐയുടെ പിന്തുണ തേടി തമിഴക വെട്രി കഴകം അധ്യക്ഷൻ വിജയ് ഔദ്യോഗികമായി കത്തയച്ചു. വിജയ് നേരിട്ട് ഒപ്പിട്ട ലെറ്റർ ഹെഡിലുള്ള കത്ത് തമിഴ്നാട് സിപിഐ സംസ്ഥാന സെക്രട്ടറിക്ക് ലഭിച്ചതായി പാർട്ടി നേതാവ് ആനി രാജ വ്യക്തമാക്കി. പിന്തുണ നൽകുന്ന കാര്യത്തിൽ സംസ്ഥാന കമ്മിറ്റി ചർച്ച ചെയ്ത ശേഷം തീരുമാനം ദേശീയ നേതൃത്വത്തെ അറിയിക്കുമെന്നും വരും ദിവസങ്ങളിൽ ചേരുന്ന ദേശീയ എക്സിക്യൂട്ടീവ്, ദേശീയ കൗൺസിൽ യോഗങ്ങളിൽ ഉചിതമായ തീരുമാനമുണ്ടാകുമെന്നും അവർ അറിയിച്ചു. തമിഴ്നാട്ടിൽ ബിജെപിയെയും അതിന്റെ സഖ്യകക്ഷികളെയും അധികാരത്തിൽ നിന്ന് അകറ്റിനിർത്തുക എന്നതാണ് സിപിഐയുടെ പ്രധാന ലക്ഷ്യം. ഈ രാഷ്ട്രീയ ലക്ഷ്യത്തിന് അനുസൃതമായിട്ടായിരിക്കും പാർട്ടി നിലപാട് സ്വീകരിക്കുക എന്നും അവർ പറഞ്ഞു.
ടിവികെയെ പിന്തുണയ്ക്കണമോ വേണ്ടയോ എന്ന കാര്യത്തിൽ പാർട്ടിക്ക് മുന്നിൽ പല ഓപ്ഷനുകളുണ്ട്. വിജയിന്റെ പാർട്ടിക്ക് മറ്റ് കക്ഷികളോടുള്ള, പ്രത്യേകിച്ച് എഡിഎംകെയോടുള്ള സമീപനം കൂടി പരിശോധിച്ച ശേഷമായിരിക്കും തീരുമാനമെടുക്കുക എന്നും അവർ വ്യക്തമാക്കി.
