മലപ്പുറം : മലപ്പുറം ജില്ല വിഭജിക്കണമെന്ന് തിരൂര് സബ് കളക്ടര് ദിലീപ് കെ കൈനിക്കര. സമൂഹമാധ്യമത്തിലൂടെയാണ് അദ്ദേഹം ആഗ്രഹം പങ്കുവെച്ചത്. വിഷയം പുതിയ സര്ക്കാര് വരുമ്പോള് പരിഗണിക്കുമെന്ന ആഗ്രഹത്തോടെയാണ് കുറിപ്പെഴുതിയതെന്നും ഭരണപരമായ കാര്യങ്ങളിലും പൊതുസൗകര്യത്തിലും ഉണ്ടാകുന്ന പുരോഗതിക്കായുളള നിക്ഷേപമായി ഇതിനെ കാണാമെന്നും ദിലീപ് കെ കൈനിക്കര ഫേസ്ബുക്കില് പങ്കുവെച്ച കുറിപ്പില് പറയുന്നു.
പെന്ഷന് പ്രായം 56-ല് നിന്നും 60 ആയി ഉയര്ത്തണമെന്നും മലയാളം മീഡിയം എന്ന രീതി എല്പി തലത്തിന് അപ്പുറത്തേക്ക് കൊണ്ടുപോകരുതെന്നും ദിലീപ് ആവശ്യപ്പെട്ടു. ഹയര്സെക്കന്ഡറി വരെ ഇംഗ്ലീഷ് മീഡിയം ആക്കണമെന്നും എ പ്ലസ് ഉദാരവല്ക്കരണം അവസാനിപ്പിക്കണമെന്നും ദിലീപ് പറഞ്ഞു. ജില്ലയുടെ വിഭജനത്തെക്കുറിച്ച് പലപ്പോഴും പ്രപ്പോസല് അയച്ചിട്ടുണ്ടെന്നും ദിലീപ് വ്യക്തമാക്കി.
