ആലപ്പുഴ: മലപ്പുറം താനൂര് ബോട്ട് അപകടത്തിന്റെ പശ്ചാത്തലത്തില് സംസ്ഥാനത്തെ ബോട്ടുകളില് മിന്നല് പരിശോധന. ആലപ്പുഴയിലും എറണാകുളം മരട് നഗരസഭാ പരിധിയിലും വിനോദസഞ്ചാര ബോട്ടുകളില് തുറമുഖവകുപ്പ് പരിശോധന നടത്തി. ലൈസന്സില്ലാത്ത ബോട്ടുകള്ക്കെതിരെ കര്ശന നടപടി സ്വീകരിക്കുമെന്ന് തുറമുഖവകുപ്പ് അറിയിച്ചു. മരട് നഗരസഭയിലെ സ്പെഷ്യല് സ്ക്വാര്ഡ് വിഭാഗമാണ് നാലിടങ്ങളില് പരിശോധന നടത്തിയത്. പരിശോധനയില് ആവശ്യമായ രേഖകള് ഇല്ലെന്ന് കണ്ടെത്തിയ ബോട്ടുടമകള്ക്ക് രേഖകള് സമര്പ്പിക്കാന് ഒരു ദിവസം സമയം അനുവദിച്ചു.
അതേസമയം യാത്രക്കാരുടെ സുരക്ഷ ഉറപ്പാക്കുന്നതിനുള്ള നടപടികളില് അലംഭാവം കാണിക്കുന്നവര്ക്കെതിരെ കര്ശന നടപടികളുണ്ടാകുമെന്ന് നഗരസഭ മുന്നറിയിപ്പ് നല്കി. വരും മണിക്കൂറുകളിലും പരിശോധനകള് നടക്കുമെന്ന് നഗരസഭ അറിയിച്ചു.