ദില്ലി: കേരളത്തിലെ കോണ്ഗ്രസ് നേതാക്കള്ക്ക് മുന്നറിയിപ്പുമായി എഐസിസി ജനറല് സെക്രട്ടറി താരിഖ് അന്വര്. പരസ്യപ്രതികരണത്തിലാണ് കേരളത്തിലെ നേതാക്കള്ക്ക് മുന്നറിയിപ്പ് നല്കിയിരിക്കുന്നത്. അച്ചടക്കത്തിന്റെ ലക്ഷ്മണ രേഖ കടക്കാന് പാടില്ല, എംപിമാരുമായി ആശയവിനിമയം നടത്തും. പ്രശ്നങ്ങള് ചര്ച്ച ചെയ്ത് പരിഹരിക്കുമെന്നും താരിഖ് അന്വര് പറഞ്ഞു.
അതേസമയം കെപിസിസി യോഗത്തിലെ വിമര്ശനങ്ങളുടെ പശ്ചാത്തലത്തില് ഹൈക്കമാന്ഡിനെ സമീപിക്കാനാണ് എംപിമാരുടെ തീരുമാനം. ലോക്സഭാ തിരഞ്ഞെടുപ്പിന് മാസങ്ങള് മാത്രം ശേഷിക്കെ വിജയിപ്പിക്കേണ്ട നേതൃത്വം തങ്ങളെ തോല്പ്പിക്കാന് തയ്യാറെടുപ്പുകള് നടത്തുകയാണെന്നാണ് എംപിമാരുടെ കുറ്റപത്രം. മുതിര്ന്ന നേതാക്കളെയും എംപിമാരെയും രണ്ടാം നിര നേതാക്കള് അപമാനിക്കുന്നത് നേതൃത്വത്തിന്റെ ഒത്താശയോടെ ആണെന്ന് ശശി തരൂര്, കെ.മുരളീധരന്, എം.കെ.രാഘവന് ഉള്പ്പെടെയുള്ളവര് വിശ്വസിക്കുന്നു. വിഷയത്തില് ഹൈക്കമാന്ഡിന്റെ അടിയന്തര ഇടപെടല് തേടാനാണ് എംപിമാരുടെ നീക്കം.
