കൂത്തുപറമ്പ് : തൊക്കിലങ്ങാടി കൂത്തുപറമ്പ് ഹയര്‍ സെക്കന്‍ഡറി സ്കൂളില്‍ രണ്ട് വിദ്യാര്‍ഥിനികളെ മര്‍ദിച്ചെന്ന പരാതിയില്‍ സ്കൂള്‍ കായികാധ്യാപകനെ പോലീസ് അറസ്റ്റ് ചെയ്തു. യൂനിഫോം ലംഘനം നടത്തിയെന്ന് പറഞ്ഞ് അധ്യാപകന്‍ മര്‍ദിച്ചെന്നാണ് പരാതി. പരിക്കേറ്റ വിദ്യാര്‍ഥിനികള്‍ കൂത്തുപറമ്പ് താലൂക്കാശുപത്രിയില്‍ ചികിത്സതേടി. കഴിഞ്ഞ ദിവസം രണ്ട് വിദ്യാര്‍ഥിനികള്‍ കറുത്ത ശിരോവസ്ത്രം ധരിച്ച്‌ സ്കൂളില്‍ എത്തിയതോടെയാണ് വിവാദ സംഭവം. അച്ചടക്ക കമ്മിറ്റി കണ്‍വീനറായ അധ്യാപകന്‍ കുട്ടികളെ ചോദ്യം ചെയ്യുകയും മര്‍ദിച്ചെന്നുമാണ് പരാതി. യൂനിഫോമിനൊപ്പം അനുവദിക്കപ്പെട്ട വെള്ള വസ്ത്രത്തിന് പകരം കറുത്ത ശിരോവസ്ത്രം ധരിച്ചെത്തിയതാണ് അധ്യാപകനെ പ്രകോപിപ്പിച്ചത്. മര്‍ദനമേറ്റ വിദ്യാര്‍ഥിനികളാണ് രക്ഷിതാക്കള്‍ക്കൊപ്പമെത്തി പോലീസില്‍ പരാതി നല്‍കിയത്.
പോലീസ് കേസ് രജിസ്റ്റര്‍ ചെയ്തശേഷം അധ്യാപകനെ അറസ്റ്റ് ചെയ്തു. സംഭവവുമായി ബന്ധപ്പെട്ട് സ്കൂള്‍ പരിസരത്ത് ശനിയാഴ്ച രാവിലെ മുതല്‍ ശക്തമായ പോലീസ് സന്നാഹം ഏര്‍പ്പെടുത്തിയിരുന്നു. എ.സി.പി സജേഷ് വാഴാളപ്പില്‍, ഇന്‍സ്പെക്ടര്‍ പി.എ ബിനുമോഹന്‍, എസ്.ഐമാരായ പി.ബിജു, കെ.ടി സന്ദീപ് തുടങ്ങിയവരുടെ നേതൃത്വത്തിലാണ് പോലീസ് സ്ഥലത്ത് ക്യാമ്പ് ചെയ്തത്. അതേസമയം, സ്കൂളില്‍ ഹിജാബ് വിലക്കിയിട്ടില്ലെന്നും വെള്ള ഹിജാബിന് പകരം കറുപ്പ് ഹിജാബ് ധരിച്ചത് അധ്യാപകന്‍ ചോദ്യം ചെയ്യുക മാത്രമാണുണ്ടായതെന്നും സ്കൂള്‍ മാനേജ്മെന്റ് വ്യക്തമാക്കി. മുന്‍ അധ്യാപകന്റെ നിര്യാണത്തെ തുടര്‍ന്ന് ശനിയാഴ്ച വിദ്യാലയത്തിന് അവധി നല്‍കിയിരുന്നു.
