കോതമംഗലം : തിരുവിതാംകൂര്‍ ദേവസ്വം ബോര്‍ഡിന്റെ തൃക്കാരിയൂര്‍ സ്ട്രോംഗ്റൂമില്‍ സൂക്ഷിച്ച സ്വര്‍ണത്തില്‍ മുക്കുപണ്ടം കണ്ടെത്തിയ സംഭവത്തില്‍ ബോര്‍ഡ് അന്വേഷണം തുടങ്ങി. കഴിഞ്ഞ ദിവസം ഇവിടെ കണക്കെടുപ്പ് നടന്നപ്പോള്‍ കോടനാട് ക്ഷേത്രത്തില്‍ നിന്നും കൊണ്ടുവന്ന് സൂക്ഷിച്ച സ്വര്‍ണത്തിലാണ് ചെമ്പില്‍ സ്വര്‍ണം പൂശിയവ കണ്ടെത്തിയത്. കോടനാട് ക്ഷേത്രത്തിലെ ഭണ്ഡാരത്തില്‍ സമര്‍പ്പിക്കപ്പെട്ട താലി, പൊട്ട്, രൂപം തുടങ്ങിയ 30 ഗ്രാമോളം സ്വര്‍ണത്തിലെ പതിനൊന്ന് ഗ്രാമിലാണ് ക്രമക്കേട്.
തൃക്കാരിയൂര്‍ ഗ്രൂപ്പിന് കീഴിലുള്ള നൂറില്‍പരം ക്ഷേത്രങ്ങളിലെ തിരുവാഭരണങ്ങളും വഴിപാട് സ്വര്‍ണവും പഞ്ചലോഹവും സൂക്ഷിക്കുന്നത് ദേവസ്വം അസിസ്റ്റന്റ് കമ്മീഷനറുടെ തൃക്കാരിയൂര്‍ ആസ്ഥാനത്തുള്ള സ്ട്രോങ് റൂമിലാണ്. ഭണ്ഡാരം തുറക്കുമ്പോള്‍ ലഭിക്കുന്ന സ്വര്‍ണവും മറ്റ് വിലപിടിപ്പുള്ളവയും സ്വര്‍ണപ്പണിക്കാരെ കൊണ്ട് പരിശോധിപ്പിച്ച്‌ മുദ്രവച്ച്‌ സ്ട്രോംഗ്റൂമില്‍ സൂക്ഷിക്കുകയാണ് പതിവ്. വിവിധ ക്ഷേത്രങ്ങളിലെ സ്വര്‍ണവും വെള്ളിയും കണക്കെടുക്കുന്ന പ്രക്രിയയുടെ ഭാഗമായിരുന്നു പരിശോധന. ജീവനക്കാരി കൊവിഡ് നിരീക്ഷണത്തിലായതിനാല്‍ തൃക്കാരിയൂര്‍ ദേവസ്വം ഓഫീസ് പൂട്ടിയിരിക്കുകയാണ്. ബുധനാഴ്ച വിജിലന്‍സ് സംഘം എത്തിയെങ്കിലും ഇതുമൂലം പരിശോധന നടന്നില്ല. 2013 ല്‍ ക്ഷേത്ര ഭണ്ഡാരം എണ്ണി തിട്ടപ്പെടുത്തുന്നതിനിടെ നടന്ന പണാപഹരണത്തിന്റെ ദൃശ്യങ്ങള്‍ പ്രചരിച്ചത് വലിയ വിവാദങ്ങള്‍ക്ക് കാരണമായിരുന്നു.
നഷ്ടപ്പെട്ട സ്വര്‍ണത്തിന് പകരം സ്വര്‍ണം നല്‍കി ദേവസ്വത്തിലെ യൂണിയന്‍ നേതാക്കള്‍ ചില ഉദ്യോഗസ്ഥരുടെ ഒത്താശയോടെ പ്രശ്നം ഒതുക്കി തീര്‍ക്കാനും ശ്രമിക്കുന്നുണ്ടെന്ന് ഹിന്ദു ഐക്യവേദി ആരോപിച്ചു. കൊവിഡ് മാനദണ്ഡങ്ങള്‍ പാലിച്ച്‌ തൃക്കാരിയൂര്‍ മഹാദേവക്ഷേത്രത്തിന് മുന്നില്‍ നാമജപ ധര്‍ണയും ഇവര്‍ നടത്തി. അതേസമയം ദേവസ്വം ബോര്‍ഡിന്റെ തൃക്കാരിയൂര്‍ സ്ട്രോംഗ് റൂമില്‍ സൂക്ഷിച്ച സ്വര്‍ണത്തില്‍ തിരിമറി നടന്നിട്ടില്ല എന്ന് ദേവസ്വം കമ്മീഷണര്‍ അറിയിച്ചു . ക്ഷേത്രത്തില്‍ നിന്ന് മുദ്രവെച്ച്‌ കൊണ്ടുവന്ന സ്വര്‍ണം ഇവിടെ സൂക്ഷിക്കുക മാത്രമേ ചെയ്തിട്ടുള്ളൂ. പരിശോധനയില്‍ ക്രമക്കേട് കണ്ടെത്തിയാല്‍ മുദ്രവെച്ച്‌ നല്‍കിയ ഉദ്യോഗസ്ഥര്‍ക്കെതിരെ നടപടിയുണ്ടാകുമെന്നും അദ്ദേഹം പറഞ്ഞു
