കോട്ടയം : ഏറ്റുമാനൂര്‍ മഹാദേവ ക്ഷേത്രത്തിലെ സ്വര്‍ണ രുദ്രാക്ഷമാല കാണാതായ സംഭവത്തില്‍ മുന്‍ മേല്‍ശാന്തിയെ പ്രതിയാക്കി പോലീസ് കേസെടുത്തു. കാഞ്ഞങ്ങാട് തളിയില്‍ വാരിക്കാട് കേശവന്‍ സത്യേഷിനെതിരെയാണ് ഏറ്റുമാനൂര്‍ പോലീസിന്‍റെ നടപടി. മാല നല്‍കിയ മുന്‍ അഡ്മിനിസ്ട്രേറ്റീവ് ഓഫിസര്‍ മാല നിര്‍മ്മിച്ച സ്വര്‍ണ്ണപ്പണിക്കാരന്‍ ഉള്‍പ്പെടെ 17 പേരുടെ മൊഴി പോലീസ് രേഖപ്പെടുത്തി.
81 രുദ്രാക്ഷമണികളും 23 ഗ്രാം തൂക്കവുമുള്ള മാല മോഷണം പോയെന്ന് പോലീസും സ്ഥിരീകരിക്കുന്നു. കേശവന്‍ സത്യേഷ് ചുമതലയൊഴിഞ്ഞതിനു ശേഷം കഴിഞ്ഞ ജൂലൈ ആദ്യം പുതിയ മേല്‍ശാന്തി ചുമതലയേറ്റപ്പോഴാണ് മാല കാണാതായ സംഭവം പുറത്തറിഞ്ഞത്. നഷ്ടപ്പെട്ട മാലയ്ക്കു പകരം 72 മുത്തുകളുള്ള മറ്റൊരു മാല കണ്ടെത്തുകയും ചെയ്തു. അതേസമയം പോലീസ് ചോദ്യം ചെയ്യാനിരിക്കെ ഇദ്ദേഹം മുന്‍കൂര്‍ ജാമ്യത്തിനായി ഹൈക്കോടതിയെ സമീപിച്ചു.
ദേവസ്വം ബോര്‍ഡ് വിജിലന്‍സിന് പിന്നാലെ മാല മോഷണംപോയെന്നാണ് പൊലീസിന്‍റെയും നിഗമനം. മോഷണക്കുറ്റം ചുമത്തി അന്വേഷണം ആരംഭിച്ച പോലീസ് മുന്‍ മേല്‍ശാന്തിയെയാണ് പ്രതിസ്ഥാനത്ത് നിര്‍ത്തുന്നത്. അടുത്ത ദിവസം മുന്‍ മേല്‍ശാന്തി കേശവന്‍ സത്യേഷിനെ ചോദ്യം ചെയ്യുന്നതിനായി നോട്ടിസ് നല്‍കും. ആഭരണങ്ങള്‍ സൂക്ഷിക്കേണ്ട ചുമതല മേല്‍ശാന്തിമാര്‍ക്കാണ്.
