കോഴിക്കോട് : കെഎസ്ആര്ടിസി ടെര്മിനല് ബലപ്പെടുത്താനുളള പ്രവൃത്തികള് ആറ് മാസത്തിനകം പൂര്ത്തിയാക്കുമെന്ന് ഗതാഗത മന്ത്രി ആന്റണി രാജു. കോഴിക്കോട്ടെ കെഎസ്ആര്ടിസി ടെര്മിനല് സംബന്ധിച്ച് നാളുകള് നീണ്ട ചര്ച്ചകള്ക്കും വിവാദങ്ങള്ക്കുമൊടുവില് കഴിഞ്ഞ ദിവസമാണ് ചെന്നൈ ഐഐടി സംഘം അന്തിമ റിപ്പോര്ട്ട് സമര്പ്പിച്ചത്. പ്രാഥമിക റിപ്പോര്ട്ടില് ചൂണ്ടിക്കാട്ടിയതു പ്രകാരം കെട്ടിടത്തിന്റെ രൂപകല്പനയില് പ്രശ്നമുണ്ടെന്നാണ് അന്തിമ റിപ്പോര്ട്ടിലും പറയുന്നത്.
കെട്ടിടത്തിന്റെ ഭൂരിഭാഗം തൂണുകള്ക്കും ബലക്കുറവ് ഉണ്ടെന്നാണ് ചെന്നൈ ഐഐടി സംഘത്തിന്റെ അന്തിമ റിപ്പോര്ട്ട്. തൂണുകള്ക്കാണ് പ്രധാനമായും ബലക്ഷയമുളളത്. എന്നാല് ഏഴ് നിലകളിലായുളള കെട്ടിടത്തിന്റെ ഭാരം താങ്ങാന് കഴിയുന്ന വിധത്തില് കമ്പിയും സിമന്റും ഉപയോഗിച്ചിട്ടുണ്ടോ എന്ന് സംശയമാണ് ഐഐടി സംഘത്തിനുളളത്. ഇത് വ്യക്തമാകണമെങ്കില് ഭൂമിക്കടിയില് നടത്തിയ പയലിംഗ് പരിശോധിക്കണം. വേണ്ടത്ര ഉറപ്പില്ലെങ്കില് കോണ്ക്രീറ്റ് നിറച്ച് ബലപ്പെടുത്തേണ്ടി വരും. ഇത് സംബന്ധിച്ച പ്രാഥമിക ചര്ച്ചകള് കഴിഞ്ഞ ദിവസം തിരുവനന്തപുരത്ത് നടന്നു. ബസ് സ്റ്റാന്റ് മാറ്റാതെ തന്നെയാകും അറ്റക്കുറ്റപ്പണികള് പൂര്ത്തിയാക്കുകയെന്ന് മന്ത്രി ആന്റണി രാജു വ്യക്തമാക്കി.