പത്തനംതിട്ട : ഓമല്ലൂര്‍ തറയില്‍ ഫിനാന്‍സ് തട്ടിപ്പില്‍ നിക്ഷേപകര്‍ക്ക് കോടിക്കണക്കിന് രൂപ നഷ്ടപ്പെട്ടതായി പരാതി. നിലവില്‍ മുപ്പത്തഞ്ചോളം നിക്ഷേപകര്‍ പത്തനാപുരം പോലീസില്‍ പരാതി നല്‍കിയിട്ടുണ്ട്. കൊല്ലം, പത്തനംതിട്ട ജില്ലയിലെ പോലീസ് സ്റ്റേഷനുകളില്‍ രജിസ്റ്റര്‍ ചെയ്ത പരാതികള്‍ പ്രകാരം 30 കോടിയിലധികം രൂപ നിക്ഷേപകര്‍ക്ക് നഷ്ടമായതായാണ് പ്രാഥമിക നിഗമനം.
ഫിനാന്‍സ് ഉടമ സജി സാം, ഭാര്യ റാണി എന്നിവരെ പ്രതി ചേര്‍ത്താണ് പോലീസ് കേസെടുത്തിരിക്കുന്നത്. സജി സാം പോലീസില്‍ കീഴടങ്ങിയിരുന്നു. പലിശ കഴിഞ്ഞ ജനുവരിവരെ നിക്ഷേപകര്‍ക്ക് ലഭിച്ചിരുന്നു. ഫെബ്രുവരി മാസത്തെ പലിശ മുടങ്ങിയപ്പോള്‍ 10 ലക്ഷം രൂപ നിക്ഷേപിച്ച ഒരാള്‍ പത്തനംതിട്ട പോലീസ് സ്റ്റേഷനില്‍ പരാതി നല്‍കുകയായിരുന്നു. തുടര്‍ന്നാണ് ബ്രാഞ്ചുകള്‍ ഓരോന്ന് പൂട്ടാന്‍ തുടങ്ങിയത്.
അറസ്റ്റിലായ സജി സാമിനെ കഴിഞ്ഞദിവസം പത്തനാപുരം പപോലീസ് കസ്റ്റഡിയില്‍ വാങ്ങി തെളിവെടുപ്പ് നടത്തി. പണയ ഉരുപ്പടികള്‍ തിരികെ നല്‍കുന്നതിനായി പോലീസ് നിര്‍ദേശപ്രകാരം പത്തനാപുരം ബ്രാഞ്ച് പ്രവര്‍ത്തിക്കുന്നുണ്ട്. തെളിവെടുപ്പിനുശേഷം അന്വേഷണസംഘം കോടതിയില്‍ റിപ്പോര്‍ട്ട് നല്‍കി.
