കോന്നി : സുഹൃത്തിനെ വെട്ടിപരിക്കേൽപ്പിച്ച സംഭവത്തിൽ ഒളിവിൽ കഴിഞ്ഞിരുന്ന പ്രതിയെ കോന്നി പോലീസ് പിടികൂടി റിമാൻഡ് ചെയ്തു. അരുവാപ്പുലം അക്കരകാലാപ്പടി കുളമാംകൂട്ടത്തിൽ ബിജു ശാമുവേൽ (42)നെ ആണ് കോന്നി പോലീസ് പിടികൂടിയത്. കഴിഞ്ഞ ചൊവ്വാഴ്ചയാണ് കേസിന് ആസ്പദമായ സംഭവം നടന്നത്. മദ്യപാനത്തിന് ഇടയിൽ സുഹൃത്തായ അരുവാപ്പുലം അക്കരകാലാപ്പടി ഇടിഞ്ഞതോട്ട് മണ്ണിൽ വീട്ടിൽ കലേഷ് (38) നെ ബിജു വെട്ടിപരിക്കേൽപ്പിക്കുകയായിരുന്നു. ഇരുവരും ചേർന്ന് മദ്യപിച്ച ശേഷം കലേഷിന്റെ വാഹനത്തിന്റെ താക്കോലുമായി ബിജു സാമുവൽ പോകുകയായിരുന്നു.
ഇയാളെ പിൻതുടർന്ന് ബിജു സാമുവലിന്റെ ഉടമസ്ഥതയിൽ ഉള്ള ഷെഡിൽ എത്തിയ കലേഷിനെ ബിജു വെട്ടിപരിക്കേൽപ്പിക്കുകയായിരുന്നു. കഴുത്തിലും കൈക്കും പരിക്കേറ്റ കലേഷ് കോന്നിയിലെ സ്വകാര്യ ആശുപത്രിയിൽ ചികിത്സ തേടിയിരുന്നു. സംഭവത്തിൽ ഒളിവിലായിരുന്ന പ്രതി ബിജു ശാമുവലിനായി പോലീസ് തിരച്ചിൽ ഊർജിതമാക്കിയിരുന്നു. പോലീസ് നടത്തിയ അന്വേഷണത്തിൽ ഇയാളെ അരുവാപുലത്ത് നിന്നും പിടികൂടുകയായിരുന്നു. പ്രതിക്ക് എതിരെ വധ ശ്രമത്തിന് കേസെടുത്ത പോലീസ് ഇയാളെ കോടതിയിൽ ഹാജരാക്കി കൊട്ടാരക്കര സബ് ജയിലിൽ റിമാൻഡ് ചെയ്തു.
