കോന്നി: പൗരത്വ ഭേദഗതി നിയമം മതത്തിൻ്റെ പേരിൽ ജനങ്ങളെ ഭിന്നിപ്പിച്ച് വോട്ട് നേടാനുള്ള തന്ത്രമാണെന്നും ഇൻഡ്യാ മുന്നണി അധികാരത്തിൽ വന്നാൽ നിയമം റദ്ദു ചെയ്യുമെന്നും ആൻ്റോ ആൻ്റണി എം.പി പറഞ്ഞു. യു.ഡി.എഫ് കോന്നി നിയോജക മണ്ഡലം കമ്മറ്റിയുടെ നേതൃത്വത്തിൽ പൗരത്വ നിയമ ഭേദഗതിക്കെതിരെ കോന്നിയിൽ സംഘടിപ്പിച്ച പ്രതിഷേധ സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഇന്ത്യയിൽ നൂറ്റാണ്ടുകളായി നിലനിൽക്കുന്ന സാഹോദര്യവും മത സൗഹാർദ്ദവും ഇല്ലാതാക്കി ജനങ്ങളെ തമ്മിലടിപ്പിക്കുവാനുള്ള സംഘപരിവാർ ശക്തികളുടേയും കേന്ദ്ര സർക്കാരിന്റേയും ശ്രമം വിജയിക്കില്ലെന്ന് ആന്റോ ആന്റണി പറഞ്ഞു.
യു.ഡി.എഫ് നിയോജക മണ്ഡലം ചെയർമാൻ എസ്.സന്തോഷ്കുമാർ അധ്യക്ഷത വഹിച്ചു. യോഗത്തിൽ മാത്യു കുളത്തിങ്കൽ, റോബിൻ പീറ്റർ, വെട്ടൂർ ജ്യോതി പ്രസാദ് ഉമ്മൻ മാത്യം വടക്കേടത്ത്, സാമുവൽ കിഴക്കുപുറം, സജി കൊട്ടക്കാട്, ദീനാമ്മ റോയി, ആർ.ദേവകുമാർ, ജോസ് കൊന്നപ്പാറ, അബ്ദുൾ മുത്തലിഫ്, മുഹമ്മദ് അലി, രവി പിള്ള, രാജൻ പടിയറ, ജേക്കബ് മഠത്തിലേത്ത്, പ്രവീൺ പ്ലാവിളയിൽ,റോജി ഏബ്രഹാം, രാജീവ് മള്ളൂർ, ഐവാൻ വകയാർ, ടി.എച്ച് സിറാജുദീൻ, ശ്യാം. എസ്. കോന്നി ,ജി.ശ്രീകുമാർ, ഷിജു കുളത്തിങ്കൽ എന്നിവർ പ്രസംഗിച്ചു.
