ദുബായ്: തൊഴിലാളികൾക്കായി വർഷത്തിൽ നാല് ആഘോഷങ്ങൾവീതം സംഘടിപ്പിക്കുമെന്ന് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജി.ഡി.ആർ.എഫ്.എ.) അധികൃതർ അറിയിച്ചു. പെരുന്നാൾ, ബലിപെരുന്നാൾ, അന്താരാഷ്ട്ര തൊഴിലാളി ദിനം, പുതുവർഷം എന്നിവയോടനുബന്ധിച്ചായിരിക്കും ആഘോഷങ്ങൾ സംഘടിപ്പിക്കുകയെന്ന് ജി.ഡി.ആർ.എഫ്.എ. ഡയറക്ടർ ജനറൽ ലെഫ്റ്റനന്റ് ജനറൽ മുഹമ്മദ് അഹമ്മദ് അൽ മർറി അറിയിച്ചു. വികസനത്തിനും പുരോഗതിക്കും സംഭാവന നൽകുന്ന സുപ്രധാന ഘടകമാണ് തൊഴിലാളികളെന്നും അദ്ദേഹം പറഞ്ഞു. ദുബായ് കിരീടാവകാശിയും എക്സിക്യുട്ടീവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിന്റെ നിർദേശപ്രകാരമാണ് പുതിയ പ്രഖ്യാപനം.
ഈ വർഷത്തെ പെരുന്നാൾ ആഘോഷങ്ങൾ ഞായറാഴ്ച മുതൽ വ്യാഴാഴ്ച വരെ നടക്കും. ‘ഞങ്ങൾ ഒരുമിച്ച് പെരുന്നാൾ ആഘോഷിക്കുന്നു’ എന്ന പ്രമേയത്തിൽ ജബൽ അലി, അൽ ഖൂസ്, മുഹൈസിന എന്നിവിടങ്ങളിലാണ് പരിപാടികൾ നടക്കുക. ദുബായ് കൈവരിച്ച പുരോഗതിയിലും വികസനത്തിലുമുള്ള തൊഴിലാളികളുടെ സംഭാവനകൾ അംഗീകരിക്കാനാണ് കലാ, കായിക പരിപാടികൾ ഉൾപ്പെടുത്തി ആഘോഷങ്ങൾ സംഘടിപ്പിക്കുന്നത്. ദുബായ് ലാൻഡ് ഡിപ്പാർട്ട്മെന്റാണ് പരിപാടിയുടെ പ്രധാന സ്പോൺസർ. ശോഭ റിയാലിറ്റി, എല്ലിംഗ്ടൺ പ്രോപ്പർട്ടീസ്, എമിറേറ്റ്സ് എയർലൈൻസ്, തഖ്ദീർ പുരസ്കാരം, മലബാർ ഗോൾഡ് ആൻഡ് ഡയമണ്ട്സ് എന്നിവരുടെ സഹകരണത്തോടെയാണ് ആഘോഷങ്ങൾ നടത്തുക.
