ആലപ്പുഴ: വീടിന്റെ ബാത്ത്റൂമിൽ വ്യാജവാറ്റ് നടത്തിയ കേസിൽ യുവാവ് പിടിയിൽ. രഹസ്യ വിവരം ലഭിച്ചതിനെ തുടർന്ന് എക്സൈസ് നടത്തിയ റെയ്ഡിൽ കുളിമുറിയിൽ പ്രവർത്തിച്ചിരുന്ന വൻ സന്നാഹങ്ങളോടെയുള്ള വ്യാജവാറ്റ് കേന്ദ്രം കണ്ടെത്തി. ഇവിടെ നിന്ന് എക്സൈസ് സംഘം 2000 ലിറ്റർ വാഷും വാറ്റ് ഉപകരണങ്ങളും പിടിച്ചെടുത്തു. ആലപ്പുഴ പറവൂർ ഭാഗത്ത് വാടകയ്ക്ക് എടുത്ത വീടിന്റെ കുളിമുറിയിലാണ് വാറ്റിനുള്ള ഉപകരണങ്ങൾ സെറ്റ് ചെയ്കിരുന്നത്.ഇവിടെയുണ്ടായിരുന്ന അജേഷ് എന്ന യുവാവിനെ എക്സൈസ് അറസ്റ്റ് ചെയ്തു. ഇയാൾ വേറെയും ക്രിമിനൽ കേസുകളിൽ പ്രതിയായിരുന്നു എന്ന് ഉദ്യോഗസ്ഥർ പറയുന്നു.
ആലപ്പുഴ എക്സൈസ് റേഞ്ച് ഇൻസ്പെക്ടർ എം.ആർ മനോജും സംഘവും ആലപ്പുഴ സർക്കിൾ ടീമും ചേർന്ന് സംയുക്തമായാണ് പരിശോധന നടത്തിയത്. അസിസ്റ്റന്റ് എക്സൈസ് ഇൻസ്പെക്ടർ ഇ.കെ അനിൽ, പ്രിവെന്റീവ് ഓഫീസർ ജിജൂഷ് ഗോപി, സിവിൽ എക്സൈസ് ഓഫീസർമാരായ ഷെഫീക്ക്, അനിൽകുമാർ, രതീഷ് എന്നിവരും ആലപ്പുഴ സർക്കിൾ പാർട്ടിയിൽ അസിസ്റ്റന്റ് എക്സൈസ് ഇൻസ്പെക്ടർമാരായ എസ്. മധു, മനോജ് വി.കെ, സിവിൽ എക്സൈസ് ഓഫീസർമാരായ വർഗീസ് പയസ്, ആന്റണി എന്നിവരുമാണ് സംഘത്തിലുണ്ടായിരുന്നത്.
