ഡല്ഹി : പടക്കം നിറച്ച കൈതച്ചക്ക കഴിച്ച് ഗര്ഭിണിയായ ആന ചരിഞ്ഞ സംഭവത്തില് കേന്ദ്ര വനം പരിസ്ഥിതി മന്ത്രി പ്രകാശ് ജാവ്ദേക്കര് സംസ്ഥാന സര്ക്കാരിനോട് വിശദീകരണം തേടി. 15 വയസോളം പ്രായമുള്ള ഗര്ഭിണിയായ ആനയാണ് ചരിഞ്ഞത്. സംഭവത്തില് കുറ്റക്കാര്ക്കെതിരെ കര്ശന നടപടി സ്വീകരിക്കണമെന്നും കേന്ദ്രമന്ത്രി ആവശ്യപ്പെട്ടു. ശ്വാസകോശത്തില് വെളളം കയറിയതാണ് ആനയുടെ മരണകാരണം. കാട്ടുപന്നിക്ക് കെണിയായി വെച്ച സ്ഫോടകവസ്തു നിറച്ച പൈനാപ്പിള് ഭക്ഷിക്കുകയായിരുന്നു ആന. വനംവകുപ്പ് ജീവനക്കാരനായ മോഹന് കൃഷ്ണന് ഫേസ്ബുക്ക് പോസ്റ്റിലൂടെയാണ് സംഭവം പുറംലോകത്തെ അറിയിച്ചത്. ആന ചരിഞ്ഞ സംഭവത്തില് മുഖ്യമന്ത്രി പിണറായി വിജയന്, ആരോഗ്യമന്ത്രി കെ. കെ ശൈലജ തുടങ്ങിയവര് രൂക്ഷ വിമര്ശനവുമായി രംഗത്തെത്തിയിരുന്നു.
