തിരുവനന്തപുരം ; എ.ഐ ക്യാമറകള് സ്ഥാപിച്ച ശേഷം അപകടങ്ങള് കുറഞ്ഞെന്ന മുഖ്യമന്ത്രിയുടെയും ഗതാഗതമന്ത്രിയുടെയും വാദം പച്ചക്കള്ളമെന്ന് പ്രതിപക്ഷ നേതാവ് വി.ഡി സതീശൻ. നിയമസഭയിലും പുറത്തും ഈ കള്ളം ആവര്ത്തിച്ചത് കൂടാതെ സര്ക്കാര് ഹൈക്കോടതിയെയും തെറ്റിദ്ധരിപ്പിച്ചു. കള്ളക്കണക്ക് നല്കി ഹൈക്കോടതിയെ കബളിപ്പിക്കാന് ശ്രമിച്ച ഗതാഗതമന്ത്രി സത്യപ്രതിജ്ഞാലംഘനമാണ് നടത്തിയത്. സ്ഥാനത്ത് തുടരാന് അദ്ദേഹം അര്ഹനല്ലെന്നും ഗതാഗതമന്ത്രി രാജിവച്ചൊഴിയണമെന്നും വി.ഡി സതീശൻ ആവശ്യപ്പെട്ടു.
പ്രതിപക്ഷാംഗങ്ങളുടെ ചോദ്യത്തിന് നിയമസഭയില് ഗതാഗതമന്ത്രി നല്കിയ മറുപടി പൊതുസമൂഹത്തിന് മുന്നില് നില്ക്കെയാണ് മുഖ്യമന്ത്രിയും മന്ത്രിയും നട്ടാല് കുരുക്കാത്ത കള്ളം ആവര്ത്തിച്ചുകൊണ്ടിരുന്നത്. നിയമസഭാ രേഖകള് പ്രകാരം കഴിഞ്ഞ വര്ഷം ജൂണില് 3714 അപകടങ്ങളും ഈ വര്ഷം ജൂണില് 3787 അപകടങ്ങളും ഉണ്ടായി. ജൂലൈ മാസത്തില് കഴിഞ്ഞ വര്ഷത്തെ അപേക്ഷിച്ച് 254 അപകടങ്ങള് കൂടുതലായി ഉണ്ടായി. 2022 ഓഗസ്റ്റില് 3366 അപകടങ്ങളും 307 അപകട മരണങ്ങളും നടന്നപ്പോള് ഈ വര്ഷം ഓഗസ്റ്റില് 4006 അപകടങ്ങളും 353 അപകട മരണങ്ങളാണുണ്ടായത്. വസ്തുതകള് ഇതായിരിക്കെ കള്ളക്കണക്ക് നല്കി ഹൈക്കോടതിയെ പോലും തെറ്റിദ്ധരിപ്പിക്കുന്നത് ഗൂഡലക്ഷ്യത്തോടെയാണെന്ന് വിഡി സതീശൻ പറഞ്ഞു.
എ.ഐ ക്യാമറയുടെ പേരില് നടന്ന കൊള്ള മറച്ചുവയ്ക്കാനാണ് റോഡ് അപകടങ്ങളില് കുറവുണ്ടായെന്ന വ്യാജ പ്രചരണം സര്ക്കാര് ബോധപൂര്വം നടത്തുന്നത്. അഴിമതിയില് മുഖ്യമന്ത്രിയുടെ ബന്ധുക്കള്ക്ക് വരെ പങ്കുണ്ടെന്ന് തെളിയിക്കുന്ന രേഖകള് സഹിതമാണ് പ്രതിപക്ഷം ആരോപണം ഉന്നയിച്ചത്. എന്നിട്ടും മറുപടി നല്കാനോ നടപടികള് സ്വീകരിക്കാനോ മുഖ്യമന്ത്രിയോ സര്ക്കാരോ തയാറാകാത്ത സാഹചര്യത്തിലാണ് പ്രതിപക്ഷം കോടതിയെ സമീപിച്ചത്. കോടതിയുടെ പരിഗണനയിലുള്ള ഈ കേസിനെ ദുര്ബലപ്പെടുത്തുകയെന്ന ഗൂഡലക്ഷ്യത്തോടെയാണോ വ്യാജക്കണക്കുകള് നിര്മ്മിച്ചതെന്ന് സംശയിക്കേണ്ടിയിരിക്കുന്നുവെന്നും വി.ഡി സതീശൻ സൂചിപ്പിച്ചു.
