ചിറ്റാര് : ചിറ്റാര് – മണക്കയം പാലം റോഡിലെ കലുങ്ക് അപകടാവസ്ഥയിലായിട്ട് കാലങ്ങള് കഴിഞ്ഞിട്ടും നടപടി സ്വീകരിക്കാതെ അധികൃതര്. മണക്കയം മുതല് ചിറ്റാര് പഴയ സ്റ്റാന്റ് റോഡ് നിര്മ്മാണം നടക്കുന്ന സമയമായതിനാല് ഈ വഴിയാണ് സ്വകാര്യ ബസുകള് ഉള്പ്പെടെയുള്ള വാഹനങ്ങള് വഴി തിരിച്ചു വിടുന്നത്. ചിറ്റാര് – മണക്കയം പാലം റോഡില് പലയിടത്തും വലിയ കുഴികള് രൂപപ്പെട്ട് വാഹനങ്ങള്ക്ക് കടന്നുപോകാന് സാധിക്കാത്ത അവസ്ഥയാണ് ഇപ്പോള് നിലവിലുള്ളത്. കലുങ്കിന്റെ അടിഭാഗം കാലപ്പഴക്കത്താല് കോണ്ക്രീറ്റ് ഇളകി മാറി തുരുമ്പിച്ച കമ്പികള് തെളിഞ്ഞു നില്ക്കുന്നതും കാണാം.
കലുങ്കിന് അടുത്തായി അഗാധമായ കുഴിയുമുണ്ട്. തകര്ന്നു വീഴാറായ ഈ കലുങ്കിന് മുകളിലൂടെയാണ് വലിയ വാഹനങ്ങള് ഉള്പ്പെടെ കടത്തിവിട്ടിരിക്കുന്നതും. റോഡിന്റെ സംരക്ഷണ ഭിത്തിയും ഒരു ഭാഗം തകര്ന്നുപോയിട്ടുണ്ട്. സാധാരണക്കാരായ ആളുകളാണ് ഈ വഴി ദിവസവും യാത്ര ചെയ്യുന്നത്. രാത്രികാലങ്ങളില് ഈ വഴി വരുന്ന ഇരുചക്ര വാഹനയാത്രക്കാര് കലുങ്കിന് സമീപത്തെ കുഴിയില് വീണ് അപകടം സംഭവിക്കുന്നതിനും സാധ്യത ഏറെയാണ്. സമീപ മേഖലയിലെ പല റോഡുകളും അറ്റകുറ്റപ്പണികള് നടത്തിയപ്പോഴും ഈ റോഡ് മാത്രം അവഗണിക്കുകയായിരുന്നു.
