പത്തനംതിട്ട : ലോക്സഭാ തെരഞ്ഞെടുപ്പുമായി ബന്ധപ്പെട്ട് ജില്ലയിലെ വിവിധ ബൂത്തുകളിലേക്കുള്ള പോളിംഗ് സാമഗ്രികളുടെ വിതരണം പൂര്ത്തിയായി. ജില്ലയിലെ അഞ്ച് നിയോജക മണ്ഡലങ്ങളിലെയും അസിസ്റ്റന്റ് റിട്ടേണിംഗ് ഓഫീസര്മാര്ക്കാണ് കളക്ടറേറ്റിലെ ഇലക്ഷന് വെയര്ഹൗസില് സൂക്ഷിച്ചിരുന്ന ഇലക്ട്രോണിക് വോട്ടിംഗ് മെഷീനുകള് (ഇവിഎം), വിവിപാറ്റ് മെഷീനുകള് തുടങ്ങിയ പോളിംഗ് സാമഗ്രികള് കൈമാറിയത്. ആകെ 1397 വിവിപാറ്റുകളും 1290 വീതം ബാലറ്റ്, കണ്ട്രോള് യൂണിറ്റുകളുമാണുള്ളത്. 16 ന് ഇവിഎമുകളുടെ രണ്ടാം ഘട്ട റാന്റമൈസേഷന് ശേഷം 17 ന് ഇവിഎമുകള് കമ്മീഷന് ചെയ്യും.
കുറ്റപ്പുഴ മാര്ത്തോമ റെസിഡന്ഷ്യല് സ്കൂള് (തിരുവല്ല), റാന്നി സെന്റ് തോമസ് കോളജ് (റാന്നി), മൈലപ്ര മൗണ്ട് ബഥനി ഇംഗ്ലീഷ് മീഡിയം ഹയര് സെക്കന്ഡറി സ്കൂള് (ആറന്മുള), എലിയറയ്ക്കല് അമൃത വിഎച്ച്എസ്എസ് (കോന്നി), അടൂര് ബി എഡ് സെന്റര് (അടൂര്) എന്നിവയാണ് ജില്ലയിലെ വിതരണ കേന്ദ്രങ്ങള്. കാഞ്ഞിരപ്പള്ളി, പൂഞ്ഞാര് നിയോജക മണ്ഡലങ്ങളിലെ പോളിങ് സാമഗ്രികളുടെ വിതരണ – സ്വീകരണകേന്ദ്രങ്ങള് അതാത് ലോക്സഭാ മണ്ഡലത്തിന്റെ പരിധിയില് പ്രവര്ത്തിക്കും. പത്തനംതിട്ട ലോക്സഭാ മണ്ഡലത്തില് ഉള്പ്പെട്ട ഏഴ് നിയോജക മണ്ഡലങ്ങളുടെയും വോട്ടെണ്ണല് കേന്ദ്രം ചെന്നീര്ക്കര കേന്ദ്രീയ വിദ്യാലയമാണ്.
