വെച്ചൂച്ചിറ : റോഡിലെ ടാറിങ്ങിനോട് ചേർന്ന് ഓടയ്ക്കായി എടുത്ത വലിയ കുഴി അടയ്ക്കാത്തത് വെച്ചൂച്ചിറ – മന്ദമരുതി റോഡിൽ വലിയ അപകടഭീഷണി ഉയർത്തുന്നു. വെച്ചൂച്ചിറ കവലയ്ക്ക് സമീപമുള്ള അപകടകരമായ വളവിലാണ് സുരക്ഷാ ക്രമീകരണങ്ങളൊന്നുമില്ലാതെ ഓട തുറന്നു കിടക്കുന്നത്. റോഡിന്റെ ടാറിങ് അവസാനിക്കുന്ന ഭാഗത്തുതന്നെ വലിയ കുഴിയുള്ളതിനാൽ വളവിൽ എതിരെ വരുന്ന വാഹനങ്ങൾക്ക് സൗകര്യമൊരുക്കാൻ ഒരു വശത്തേക്ക് മാറുന്ന വാഹനം കുഴിയിൽ പതിക്കാൻ സാധ്യതയേറെയാണ്. രാത്രികാലങ്ങളിലും ചാറ്റൽമഴയുള്ള സമയങ്ങളിലും ഇരുചക്രവാഹന യാത്രക്കാർക്ക് ഈ കുഴി വലിയ കെണിയായി മാറുന്നുണ്ട്.
ടാറിങ്ങിനോട് ചേർന്നുള്ള ഭാഗത്ത് പുല്ലും കാടും വളർന്നു നിൽക്കുന്നതിനാൽ ദൂരത്തുനിന്ന് വരുന്ന യാത്രക്കാർക്ക് ഓടയുടെ സാന്നിധ്യം പെട്ടെന്ന് തിരിച്ചറിയാനും സാധിക്കുന്നില്ല. കാല്നടയാത്രക്കാരുടെ കാര്യവും അപകടത്തിലാണ്. സ്കൂള് കുട്ടികള് ഉള്പ്പെടെ നടന്നുപോകുന്ന റോഡരികിലെ ഈ കുഴി വലിയ അപകടക്കെണിയാവുകയാണ്. അപകടം ഉണ്ടാകുന്നതിന് മുൻപ് ഓടയ്ക്ക് മുകളിൽ സ്ലാബുകൾ സ്ഥാപിച്ച് ഗതാഗതം സുരക്ഷിതമാക്കണമെന്ന് നാട്ടുകാരും യാത്രക്കാരും ശക്തമായി ആവശ്യപ്പെടുന്നു.
