ബസ് ഓടിക്കുന്നതിനിടെ ഡ്രൈവര്മാര്ക്ക് ഹൃദയാഘാതവും പക്ഷാഘാതവും സംഭവിച്ച വാര്ത്തകള് കൊവിഡ് വ്യാപനത്തിന് ശേഷമാണ് നമ്മള് കേട്ട് തുടങ്ങിയത്. അത്തരം സന്ദര്ഭങ്ങളില് ഡ്രൈവറുടെയും കണ്ടക്ടറുടെയും അവസരോചിതമായ ഇടപെടലുകളില് യാത്രക്കാരുടെ ജീവന് സുരക്ഷിതമാക്കിയിരുന്നു. എന്നാല് കൊവിഡിനും മുമ്പ് 2013 ല് വാഷിങ്ടണിലെ ഒരു സ്കൂൾ ബസ് ഓടിക്കുന്നതിനിടെ ഡ്രൈവർക്ക് ഹൃദയാഘാതമുണ്ടാവുകയും ഒരു കുട്ടി അതിസാഹസീകമായി ബസ് നിര്ത്തുകയും ചെയ്ത ഒരു വീഡിയോ കഴിഞ്ഞ ദിവസം ട്വിറ്ററില് വൈറലായി. ഡ്രൈവര് ഹൃദയാഘാതം വന്ന് പുറകിലേക്ക് വീണെങ്കിലും ആ സ്കൂള് ബസിലുണ്ടായിരുന്ന ഒരു 13 കാരന് ഉടനെ ബസിന്റെ സ്റ്റിയറിങ്ങ് നിയന്ത്രിക്കുകയും ബസ് സുരക്ഷിതമായി നിര്ത്തുകയും ചെയ്തതിനാല് വലിയ ദുരന്തമൊഴിവായി.
എന്നും ആളുകളെ പ്രചോദിപ്പിക്കുന്ന ഒരു കാര്യമാണ് അന്ന് ആ 13 കാരന് ചെയ്തത്. അന്ന് തന്നെ ആ വീഡിയോ യൂറ്റ്യൂബില് പ്രസിദ്ധപ്പെടുത്തുകയും ഏറെ പേരുടെ ശ്രദ്ധ ആകര്ഷിക്കുകയും ചെയ്തിരുന്നു. കഴിഞ്ഞ ദിവസങ്ങളില് ഈ വീഡിയോ വീണ്ടും ട്വിറ്ററില് പ്രസിദ്ധപ്പെടുത്തിയതിന് പിന്നാലെ നിരവധി പേരുടെ ശ്രദ്ധനേടി. ചില കാര്യങ്ങളങ്ങനെയാണ്. കാലമെത്ര കഴിഞ്ഞാലും അത് വീണ്ടും വീണ്ടും നമ്മുടെ ഓര്മ്മകളിലേക്ക് കയറിവരും. പ്രത്യേകിച്ചും ഇത്തരം ചില നന്മയുടെയും സാഹസികതയുടെയും കാര്യമാണെങ്കില് പിന്നെ പറയേണ്ട. വീഡിയോ ട്വിറ്ററില് പങ്കിടപ്പെട്ടതിന് പിന്നാലെ നിരവധി പേരാണ് ആ കുരുന്ന് ബാലന്റെ ധൈര്യത്തെയും പ്രവൃത്തിയും പുകഴ്ത്തി രംഗത്തെത്തിയത്. സാധാരണക്കാര് ഭയന്ന് പോകുന്ന ഇത്തരം നിര്ണ്ണായക സന്ദര്ഭങ്ങളില് ഒരു കുട്ടി ഉണര്ന്ന് പ്രവര്ത്തിച്ചത് ഇന്നും ഏറെ പേരുടെ ശ്രദ്ധയാകര്ഷിക്കുന്നു.
