ഗ്രീക്ക്: ഏഥൻസിന് സമീപമുള്ള തനാഗ്ര വ്യോമതാവളത്തിൽ നടന്ന വാർഷിക വ്യോമ പ്രദർശനത്തിനിടയിൽ ഗ്രീക്ക് വ്യോമസേനയുടെ എഫ്-4 ഫാന്റം ജെറ്റ് തകർന്നുവീണു. ആയിരക്കണക്കിന് കാണികൾ പങ്കെടുത്ത ‘ഏഥൻസ് ഫ്ലൈയിംഗ് വീക്ക്’ എന്ന പരിപാടിക്കിടെ പ്രാദേശിക സമയം ഉച്ചകഴിഞ്ഞ് 3 മണിയോടെയായിരുന്നു അപകടം.വിമാനം പറന്നുയർന്ന് ആദ്യ രണ്ട് മിനിറ്റിനുള്ളിൽ റൺവേയ്ക്ക് സമീപമുള്ള മരങ്ങളിൽ ഇടിച്ച് തീപിടിക്കുകയായിരുന്നു. ഭാഗ്യവശാൽ ഗ്രൗണ്ടിൽ ഉണ്ടായിരുന്ന കാണികൾക്കും മറ്റുള്ളവർക്കും ആർക്കും പരിക്കേറ്റിട്ടില്ലെങ്കിലും, അപകടസ്ഥലത്തുണ്ടായ തീപിടുത്തം രക്ഷാപ്രവർത്തനം സങ്കീർണ്ണമാക്കി.
11 ഫയർ എയർക്രാഫ്റ്റുകളുടെയും ഹെലികോപ്റ്ററുകളുടെയും സഹായത്തോടെ ഏകദേശം 85 അഗ്നിശമന സേനാംഗങ്ങൾ ചേർന്നാണ് തീ നിയന്ത്രണവിധേയമാക്കിയത്. വിമാനത്തിലുണ്ടായിരുന്ന രണ്ട് ജീവനക്കാരുടെ അവസ്ഥയെക്കുറിച്ചുള്ള ഔദ്യോഗിക വിവരങ്ങൾ ഉടൻ ലഭ്യമായിരുന്നില്ല.ലോകത്ത് എഫ്-4 ഫാന്റം യുദ്ധവിമാനങ്ങൾ ഇപ്പോഴും പ്രവർത്തനക്ഷമമായി ഉപയോഗിക്കുന്ന ചുരുക്കം ചില രാജ്യങ്ങളിൽ ഒന്നാണ് ഗ്രീസ്. വ്യോമസേനയെ F-16 വൈപ്പർ, F-35A തുടങ്ങിയ ആധുനിക വിമാനങ്ങളിലേക്ക് നവീകരിക്കുന്നതിനിടയിലാണ് ഈ പഴയകാല ജെറ്റ് അപകടത്തിൽപ്പെട്ടത്.
