പെരുനാട് : ക്ഷീരവികസന വകുപ്പിന്റെ 2025-26 വാർഷിക പദ്ധതിയുടെ ഭാഗമായി പത്തനംതിട്ട ജില്ലയിൽ അനുവദിച്ച ഏക സ്മാർട്ട് ഡയറി ഉദ്ഘാടനം ചെയ്തു. 40 വയസ്സിൽ താഴെയുള്ള യുവാക്കളെ ക്ഷീരമേഖലയിലേക്ക് ആകർഷിക്കുന്നതിനായി നടപ്പിലാക്കുന്ന ഈ പദ്ധതിയിൽ ബെൻസി പി. ബാബുവിന്റെ ഉടമസ്ഥതയിലുള്ള ഫാമാണ് സ്മാര്ട്ട് ഡയറിയായി മാറ്റിയത്. നെടുമൺ ക്ഷീരോത്പാദക സഹകരണ സംഘത്തിന് കീഴിലാണ് ഫാം പ്രവർത്തിക്കുക. 10 പശുക്കളെ വാങ്ങുന്നതിനായി 11 ലക്ഷം രൂപ ബാങ്ക് ലോൺ എടുക്കുന്ന സംരംഭകർക്ക് ക്ഷീരവികസന വകുപ്പ് 4,64,000 രൂപ സബ്സിഡി നൽകുന്നതാണ് പദ്ധതി.
ക്ഷീരവികസന വകുപ്പ് ഡെപ്യൂട്ടി ഡയറക്ടർ പി. അനിത സ്മാര്ട്ട് ഡയറി ഫാം ഉദ്ഘാടനം ചെയ്തു. മിൽമ തട്ട ഡയറി അസിസ്റ്റന്റ് മാനേജർ ഡോ.ഗിരീഷ് ‘സഹായഹസ്തം’ പദ്ധതിയിലൂടെ 10 പേർക്കായി 6000രൂപ വീതം കൈമാറി. ക്ഷീരവികസന വകുപ്പ് അസിസ്റ്റന്റ് ഡയറക്ടർമാരായ വിജി വിശ്വം, ഡോ.അജിത് പിള്ള, റാന്നി ക്ഷീരവികസന ഓഫീസർ റോൺ റോയ്, ഡയറി ഫാം ഇൻസ്ട്രക്ടര്മാരായ ഒ.ബി പ്രശാന്ത്, സ്വപ്ന, സംഘം പ്രസിഡന്റ് സി. സുരേഷ്, സെക്രട്ടറി സന്ധ്യ രാജ് എന്നിവർ പ്രസംഗിച്ചു.
