കണ്ണൂർ: സിപിഎം നിയന്ത്രണത്തിലുള്ള ഹലാൽ ഫായിദ സഹകരണ സംഘത്തിനെതിരായ സാമ്പത്തിക ആരോപണങ്ങളിൽ ഔദ്യോഗിക വിശദീകരണവുമായി ഭരണസമിതി രംഗത്ത്. സംഘം ആരിൽ നിന്നും നിക്ഷേപങ്ങൾ സ്വീകരിച്ചിട്ടില്ലെന്നും ഓഹരികളായി മാത്രമാണ് പണം കൈപ്പറ്റിയതെന്നുമാണ് ഭരണസമിതി വ്യക്തമാക്കുന്നത്. കഴിഞ്ഞ വ്യാഴാഴ്ച മയ്യിൽ സ്വദേശിയായ നിക്ഷേപകൻ പരാതിയുമായി രംഗത്തെത്തിയിരുന്നു. വിവാദം ആരംഭിച്ച് അഞ്ചാം ദിവസമാണ് സംഘം പ്രസിഡന്റ് ഇ. അബ്ദുൽ കരീം കുറിപ്പിലൂടെ വിശദീകരണം പുറത്തിറക്കിയിരിക്കുന്നത്. സഹകരണ സംഘത്തിനെതിരെ പരാതി ഉയർന്നപ്പോൾ തന്നെ പണം തിരികെ നൽകിയിരുന്നു.
എന്നാൽ ഇക്കാര്യത്തിൽ ഔദ്യോഗികമായി പ്രതികരിക്കാൻ അന്ന് ഭരണസമിതി തയ്യാറായിരുന്നില്ല. നിലവിലെ പുതിയ വിശദീകരണ പ്രകാരം സംഘം ആരിൽ നിന്നും പുറമെ നിന്നുള്ള നിക്ഷേപങ്ങൾ സ്വീകരിച്ചിട്ടില്ല. മറിച്ച്, 6,913 ഓഹരികളിൽ നിന്നായി 17,28,250 രൂപയാണ് സമാഹരിച്ചത്. ഇതിൽ 6,65,338 രൂപ ഓഫീസ് സജ്ജമാക്കുന്നതിനായി ഇതിനോടകം ചിലവഴിച്ചതായും ഭരണസമിതിയുടെ കുറിപ്പിൽ വ്യക്തമാക്കുന്നു. മറ്റു ചില ആരോപണങ്ങൾ ഉയർന്നതുപോലെ സ്ഥാപനം അടച്ചുപൂട്ടുമെന്ന തരത്തിലുള്ള പ്രചാരണങ്ങളെയും ഭരണസമിതി തള്ളി. സ്ഥാപനം ശക്തമായി തന്നെ മുന്നോട്ട് പോകുമെന്നാണ് വിശദീകരണം.
സംഘത്തിന്റെ പ്രവർത്തനങ്ങൾ കൂടുതൽ സുതാര്യമാക്കുന്നതിന്റെ ഭാഗമായി വരുന്ന സെപ്റ്റംബർ മാസത്തിൽ ഓഹരി ഉടമകളുടെ യോഗം വിളിച്ചു ചേർക്കും. നിലവിൽ അടഞ്ഞുകിടക്കുന്ന കണ്ണൂരിലെ സംഘത്തിന്റെ ഓഫീസിൽ വെച്ചുതന്നെയാകും ഈ യോഗം ചേരുക. ഇതിനായി തീയതി വ്യക്തമാക്കി ഓഹരി ഉടമകളുടെ വീടുകളിലേക്ക് കത്തയക്കുമെന്നും ഭരണസമിതി അറിയിച്ചു. ഈ യോഗത്തിൽ വെച്ച് ഇതുവരെ ലഭിച്ച പണത്തിന്റെയും വരവ്-ചെലവുകളുടെയും കൃത്യമായ കണക്കുകൾ ഉടമകൾക്ക് മുൻപിൽ അവതരിപ്പിക്കും. നിലവിൽ തയ്യാറാക്കിയ വിശദീകരണ കുറിപ്പിന്റെ പകർപ്പുകൾ ഇതിനോടകം തന്നെ ഓഹരി ഉടമകൾക്ക് നൽകിയിട്ടുണ്ട്.
