ന്യൂഡൽഹി: കേരളത്തിന്റെ സമീപകാല ചരിത്രത്തിൽ ആദ്യമായി മൃഗസംരക്ഷണവും ക്ഷീരവികസനവും ആയി ബന്ധപ്പെട്ട കേസുകൾക്കായി ഹൈക്കോടതിയിൽ സ്പെഷ്യൽ ഗവൺമെന്റ് പ്ലീഡറെ ചുമതലപ്പെടുത്തി സർക്കാർ. സീനിയർ ഗവൺമെന്റ് പ്ലീഡർ പി.പി പദ്മാലയനെയാണ് മൃഗസംരക്ഷണവും ക്ഷീരവികസനവുമായി ബന്ധപ്പെട്ട കേസുകളുടെ ചുമതല സർക്കാർ നൽകിയിരിക്കുന്നത്. മുൻ യുഡിഎഫ് സർക്കാരിന്റെ ഗവൺമെന്റ് പ്ലീഡർ ആയിരുന്നു പി.പി പദ്മാലയം.
മുൻ സർക്കാരുകളുടെ കാലത്ത് അപ്രധാനമെന്ന് വിലയിരുത്തി മൃഗസംരക്ഷണ ക്ഷീരവികസന വകുപ്പുകൾക്കായി സ്പെഷ്യൽ ഗവൺമെന്റ് പ്ലീഡർമാരെ നിയമിച്ചിരുന്നില്ല. എന്നാൽ മൃഗസംരക്ഷണ, ക്ഷീര വികസനവുമായി ബന്ധപ്പെട്ട് ഹൈക്കോടതിയിലെ കേസുകളുടെ എണ്ണം വർധിക്കുന്നുവെന്ന് ചൂണ്ടിക്കാട്ടിയാണ് ഈ വകുപ്പുകളുമായി ബന്ധപ്പെട്ട കേസുകളിൽ ഹാജരാകാൻ സ്പെഷ്യൽ ഗവൺമെന്റ് പ്ലീഡറെ ചുമതലപ്പെടുത്തിയത് എന്നാണ് സർക്കാർ വൃത്തങ്ങൾ മാതൃഭൂമി ഡോട്ട് കോമിനോട് വിശദീകരിച്ചത്.
