റാന്നി: ജൽജീവൻ പദ്ധതി ട്രീറ്റ്മെൻറ് പ്ലാന്റിന് എംഎൽഎ ഫണ്ടിൽ നിന്നും സ്ഥലം വാങ്ങുന്നതിനായി പണം ചെലവഴിക്കുന്നതിന് സർക്കാർ പ്രത്യേകാനുമതി നൽകി. ചെറുകോൽ – നാരങ്ങാനം – റാന്നി കുടിവെള്ള പദ്ധതിയുടെ ട്രീറ്റ്മെന്റ് പ്ലാന്റിന് സ്ഥലം വാങ്ങുന്നതിനാണ് എംഎൽഎ ഫണ്ടിൽ നിന്നും 25 ലക്ഷം രൂപ അഡ്വ. പ്രമോദ് നാരായൺ എംഎൽഎ അനുവദിച്ചത്. ഇതിന് പ്രത്യേക അനുമതി നൽകണമെന്ന് ആവശ്യപ്പെട്ട് എംഎൽഎ സർക്കാരിനെ കത്ത് നൽകിയിരുന്നു. ഇതിൻറെ അടിസ്ഥാനത്തിലാണ് പ്രത്യേക അനുമതി നൽകി സർക്കാർ ഉത്തരവ് പുറപ്പെടുവിച്ചത്. ചെറുകോൽ, നാരങ്ങാനം പഞ്ചായത്തുകൾ പൂർണമായും റാന്നി പഞ്ചായത്തിന്റെ 12, 13 വാർഡുകളിലും കുടിവെള്ളം എത്തിക്കുന്ന സമഗ്ര പദ്ധതിയാണ് ചെറുകോൽ -നാരങ്ങാനം – റാന്നി കുടിവെള്ള പദ്ധതിയുടെ നടത്തിപ്പിനായി 68 കോടി രൂപയാണ് വകയിരുത്തിയിരിക്കുന്നത്.
പമ്പാനദിയുടെ കരയിലുള്ള പുതമൺ പമ്പ് ഹൗസിൽ നിന്നും വെള്ളം പമ്പ് ചെയ്തു ട്രീറ്റ്മെൻറ് പ്ലാന്റിൽ എത്തിച്ച് ശുദ്ധമായ കുടിവെള്ളം ജനങ്ങളിൽ എത്തിക്കുകയാണ് പദ്ധതി വഴി ലക്ഷ്യമിടുന്നത്. ഗ്രാമോദ്ധാരണത്തിന്റെ ഉടമസ്ഥതയിലുള്ള ഒരേക്കർ സ്ഥലമാണ് നേരത്തെ ട്രീറ്റ്മെൻറ് പ്ലാന്റിനായി ഉദ്ദേശിച്ചിരുന്നത്. എന്നാൽ സ്ഥലം വിട്ട് ലഭിക്കുന്നതിന് നേരിടുന്ന നിയമ തടസ്സങ്ങൾ പദ്ധതിയുടെ നിർമ്മാണത്തിനെ തന്നെ ബാധിക്കും എന്ന ഘട്ടത്തിൽ എത്തിയപ്പോഴാണ് സ്ഥലത്തിനായി സ്വകാര്യ വ്യക്തിയെ സമീപിച്ചതും അദ്ദേഹം സമ്മതം അറിയിച്ചതും. സ്ഥലത്തിനാവശ്യമായ 35 ലക്ഷം രൂപയിൽ 25 ലക്ഷം രൂപയാണ് എംഎൽഎ ഫണ്ടിൽ നിന്ന് നൽകുക. ബാക്കി 10 ലക്ഷം രൂപ ചെറുകോൽ, നാരങ്ങാനം പഞ്ചായത്തുകൾ നൽകും .
