കോന്നി : നാട്ടില് തിരിച്ചെത്തിയ പ്രവാസികളുടെ പുനരധിവാസം സർക്കാർ ഉറപ്പുവരുത്തണമെന്ന് പ്രവാസി ഫെഡറേഷൻ കോന്നി മണ്ഡലം കൺവൻഷൻ ആവശ്യപ്പെട്ടു. പ്രവാസികളുടെ സംരക്ഷണത്തിന് നോർക്കയുടെ പുനരധിവാസ പദ്ധതി പ്രകാരം വ്യവസായങ്ങളോ ബിസിനസോ തുടങ്ങുവാൻ വേണ്ടി സബ്സിഡിയോടുകൂടി നൽകപ്പെടുന്ന സാമ്പത്തിക സഹായം ബാങ്കുകൾ അട്ടിമറിക്കുന്നു. സ്വയം തൊഴിലോ ബിസിനസോ തുടങ്ങുവാൻ വേണ്ടി ലോൺ നൽകേണ്ടത് ബാങ്കുകളാണ്. ഇതിനുവേണ്ടി നോർക്കയിൽ അപേക്ഷ നൽകുമ്പോൾ ഒരു ശുപാർശ കത്ത് മാത്രമാണ് ബാങ്കുകൾക്ക് അയക്കുന്നത്. മറ്റൊരു തരത്തിലുമുള്ള ഇടപെടലും നോർക്ക റൂട്ട്സ് നടത്തുന്നില്ല. അതിനാല് നിരവധി പ്രവാസികൾക്ക് കിട്ടേണ്ട സാമ്പത്തിക സഹായം ബാങ്കുകൾ നിഷേധികക്കുകയാണ്.
നോർക്ക റൂട്ട്സിന്റെ ശക്തമായ ഇടപെടൽ ഉണ്ടെങ്കിൽ മാത്രമേ ഇതിന് പരിഹാരം ഉണ്ടാവുകയുള്ളൂ. തുടർന്നും ഇത്തരത്തിലുള്ള സമീപനമാണ് നോർക്ക റൂട്ട്സും ബാങ്കുകളും സ്വീകരിക്കുന്നതെങ്കില് ഇതിനെതിരെ ശക്തമായ സമരപരിപാടികൾ സ്വീകരിക്കുമെന്ന് പ്രവാസി ഫെഡറേഷൻ കോന്നി മണ്ഡലം കമ്മിറ്റി അറിയിച്ചു. സി.പി.ഐ. കോന്നി മണ്ഡലം സെക്രട്ടറി എ.ദീപകുമാർ കൺവൻഷൻ ഉദ്ഘാടനം ചെയ്തു. അയ്യൂബ് ഖാൻ അധ്യക്ഷത വഹിച്ചു. പ്രവാസി ഫെഡറേഷൻ ജില്ലാ സെക്രട്ടറി സുനിൽ ഖാൻ മുഖ്യ പ്രഭാഷണം നടത്തി, ഡോ.എം.രാജൻ, സജി അട്ടച്ചാക്കൽ, തുടങ്ങിയവർ സംസാരിച്ചു. ഭാരവാഹികളായി മാത്യൂസ് സ്കറിയ (പ്രസിഡണ്ട്), അയ്യൂബ് ഖാൻ (സെക്രട്ടറി) എന്നിവരടങ്ങുന്ന ഏഴംഗ കമ്മറ്റിയെ തെരഞ്ഞെടുത്തു.
