തൃശൂർ: നഗരത്തിന്റെ സാംസ്കാരിക കേന്ദ്രമായ തേക്കിൻകാട് മൈതാനത്ത് രാഷ്ട്രീയ യോഗങ്ങളും പരിപാടികളും നടത്തുന്നത് കേരള ഹൈക്കോടതി നിരോധിച്ചു. രാഷ്ട്രീയ വിശദീകരണ യോഗങ്ങൾക്കും പ്രകടനങ്ങൾക്കുമായി മൈതാനം വിട്ടുനൽകരുതെന്നാണ് കോടതിയുടെ കർശന നിർദ്ദേശം. രാഷ്ട്രീയ പാർട്ടികൾ നടത്തുന്ന പൊതുസമ്മേളനങ്ങൾ, റാലികൾ, വിശദീകരണ യോഗങ്ങൾ എന്നിവ ഇനി തേക്കിൻകാട് മൈതാനത്ത് നടത്താൻ അനുവാദമുണ്ടാകില്ല. പൊതു ഇടങ്ങൾ രാഷ്ട്രീയ ആവശ്യങ്ങൾക്കായി ഉപയോഗിക്കുന്നതിലെ നിയന്ത്രണങ്ങളുടെ ഭാഗമായാണ് ഹൈക്കോടതിയുടെ ഈ ഇടപെടൽ. ക്ഷേത്രങ്ങളിൽ രാഷ്ട്രീയത്തിന് ഒരു കാര്യവുമില്ലെന്നും, രാഷ്ട്രീയത്തിന് ക്ഷേത്രങ്ങളുമായി യാതൊരു ബന്ധവുമില്ലെന്നുമാണ് ഹൈക്കോടതി പ്രധാനമായും നിരീക്ഷിച്ചത്. അതിനാൽ തന്നെ ഇത്തരം സ്ഥലങ്ങൾ രാഷ്ട്രീയ ആവശ്യങ്ങൾക്കായി ഉപയോഗിക്കാൻ പാടില്ലെന്ന് കോടതി വ്യക്തമാക്കി.
തേക്കിൻകാട് മൈതാനത്ത് രാഷ്ട്രീയ പരിപാടികൾ നടത്തരുതെന്ന് മുൻപും ഹൈക്കോടതി ഉത്തരവുകൾ പുറപ്പെടുവിച്ചിരുന്നു. എന്നാൽ പല സംഘടനകളും പേര് മാറ്റി രാഷ്ട്രീയ പരിപാടികൾക്കായി ഈ മൈതാനം തുടർന്നും ഉപയോഗിക്കുന്നത് കോടതിയുടെ ശ്രദ്ധയിൽപ്പെട്ടിരുന്നു. ഈ സാഹചര്യം പരിഗണിച്ചാണ് ഇപ്പോൾ ഒരു തരത്തിലുള്ള രാഷ്ട്രീയ പരിപാടികൾക്കും മൈതാനം വിട്ടുനൽകരുതെന്ന കർശനമായ ഉത്തരവ് കോടതി പുറപ്പെടുവിച്ചിരിക്കുന്നത്. അതേസമയം, ദേവസ്വം വകുപ്പിന്റെയും വിവിധ ക്ഷേത്രങ്ങളുടെയും പരിപാടികൾക്കായി തേക്കിൻകാട് മൈതാനം വിട്ടുനൽകുന്നതിൽ തടസ്സമില്ലെന്നും അത് സൗജന്യമായി തന്നെ നൽകാവുന്നതാണെന്നും കോടതി പറഞ്ഞു.
മറ്റ് സർക്കാർ വകുപ്പുകളുടെ കാര്യത്തിൽ കർശനമായ നിയന്ത്രണങ്ങൾ തുടരും.കേരളത്തിലെ പ്രമുഖ രാഷ്ട്രീയ പാർട്ടികളെല്ലാം തങ്ങളുടെ പ്രധാന പരിപാടികൾക്കായി ഉപയോഗിച്ചിരുന്ന സ്ഥലമായിരുന്നു തേക്കിൻകാട് മൈതാനം. ഈ ഉത്തരവ് നഗരത്തിലെ രാഷ്ട്രീയ പ്രവർത്തനങ്ങളെ വലിയ തോതിൽ ബാധിക്കാൻ സാധ്യതയുണ്ട്. തേക്കിൻകാട് മൈതാനത്തിന്റെ പവിത്രതയും പൊതുജനങ്ങളുടെ അവകാശങ്ങളും സംരക്ഷിക്കുന്നതിന്റെ ഭാഗമായാണ് ഈ നടപടിയെന്ന് കോടതി ഉത്തരവിൽ പറയുന്നു. തൃശൂർ പൂരം പോലുള്ള സാംസ്കാരിക ഉത്സവങ്ങളെ ബാധിക്കാത്ത വിധത്തിൽ രാഷ്ട്രീയ പരിപാടികൾക്ക് മാത്രമാണ് ഈ വിലക്ക് ബാധകമാകുന്നത്.
