ചെന്നൈ: തമിഴ്നാട്ടിലെ മള്ട്ടിപ്ലക്സ് തിയറ്ററുകളില് കേരള സ്റ്റോറി ഇന്ന് മുതല് പ്രദര്ശിപ്പിക്കില്ല. ക്രമസമാധാന നിലയും സിനിമയുടെ മോശം പ്രതികരണവും ചൂണ്ടിക്കാട്ടിയാണ് തമിഴ്നാട്ടിലെ മള്ട്ടിപ്ലക്സ് തിയേറ്ററുകള് ‘ദി കേരള സ്റ്റോറി’യുടെ പ്രദര്ശനം നിര്ത്തിവച്ചത്. സിനിമ റിലീസ് ചെയ്യുന്നതിനെതിരെ തമിഴ്നാട്ടിലെ നാം തമിഴര് പാര്ട്ടി (എന്ടികെ) ശനിയാഴ്ച ചെന്നൈയില് പ്രതിഷേധ പ്രകടനം നടത്തി.
‘ദി കേരള സ്റ്റോറി’യുടെ ട്രെയിലര് പുറത്തുവന്നതിന് പിന്നാലെ വിവാദം പൊട്ടിപ്പുറപ്പെട്ടു . എന്നിരുന്നാലും, ബഹുഭാഷാ ചിത്രമായ ‘ദി കേരള സ്റ്റോറി’യുടെ റിലീസ് സ്റ്റേ ചെയ്യാന് കേരള ഹൈക്കോടതി വിസമ്മതിച്ചിരുന്നു. എന്നാല് റിലീസ് ചെയ്ത ദിവസം, കേരളത്തിലെ പല ജില്ലകളിലും ദി കേരള സ്റ്റോറിയുടെ ഷോകള് റദ്ദാക്കി. കൊച്ചിയില് നേരത്തെ ലിസ്റ്റ് ചെയ്ത രണ്ട് ഷോകള് റദ്ദാക്കി. കൊച്ചിയിലെ ലുലു മാള്, സെന്റര് സ്ക്വയര് മാള് എന്നിവിടങ്ങളിലെ തീയേറ്റര് ഉടമകളും സിനിമ ബഹിഷ്കരിച്ചു. അതുപോലെ കൊല്ലം, പത്തനംതിട്ട, കോട്ടയം, ഇടുക്കി, കണ്ണൂര്, വയനാട് ജില്ലകളിലെ തിയേറ്ററുകളും ചിത്രം പ്രദര്ശിപ്പിക്കേണ്ടെന്ന് തീരുമാനിച്ചു.
