വര്ക്കല: വര്ക്കലയില് ഭിന്നശേഷിക്കാരിയായ യുവതിയെ ഉപദ്രവിച്ചയാള് അറസ്റ്റില്. യുവതിയെ വീട്ടില് അതിക്രമിച്ചു കയറി ഉപദ്രവിച്ച കേസില് അയിരൂര് താന്നിമൂട് വീട്ടില് സുനില്കുമാര് (42) ആണ് പിടിയിലായത്. ഇയാളെ കര്ണാടകയില് നിന്നാണ് അറസ്റ്റ് ചെയ്തത്. ഇക്കഴിഞ്ഞ ഫെബ്രുവരി എട്ടിന് ഉച്ചയോടെയാണ് കേസിനാസ്പദമായ സംഭവം നടന്നത്. 32 കാരിയായ യുവതിയുടെ വീട്ടില് ആരുമില്ലാത്ത സമയത്തു എത്തിയാണ് പ്രതി ലൈംഗികമായി ഉപദ്രവിച്ചത്.
തുടര്ന്ന് മാതാപിതാക്കളുടെ പരാതിയുടെ അടിസ്ഥാനത്തില് അയിരൂര് പോലീസ് ഫെബ്രുവരി എട്ടിന് തന്നെ കേസെടുത്തിരുന്നു. എന്നാല് ഇയാള് ഒളിവില് പോവുകയായിരുന്നു. വര്ക്കല ഡി. വൈ.എസ്.പി സി.ജെ. മാര്ട്ടിന്റെ നിര്ദ്ദേശാനുസരണം അയിരൂര് സി.ഐ സുധീറിന്റെ നേതൃത്വത്തില് സബ് ഇന്സ്പെക്ടര് സജിത്, പോലീസുകാരായ ജയ് മുരുകന്, സജീവ്, വരുണ് എന്നിവരടങ്ങുന്ന സംഘമാണ് കര്ണാടകയിലെ റാം ചൂഡ് എന്ന സ്ഥലത്തെത്തി ഇയാളെ പിടികൂടിയത്.
