തിരുവനന്തപുരം : സംസ്ഥാനത്ത് കാലവർഷം എത്താൻ വൈകുമെന്ന് കേന്ദ്ര കാലാവസ്ഥാ വകുപ്പിന്റെ പുതിയ അറിയിപ്പ്. നാളെ കാലവർഷം എത്തുമെന്നായിരുന്നു നേരത്തെ പ്രവചിച്ചിരുന്നതെങ്കിലും, പുതിയ വിലയിരുത്തലുകൾ പ്രകാരം ഈ മാസം അവസാനത്തോടെ മാത്രമേ കാലവർഷം കേരളത്തിൽ എത്താൻ സാധ്യതയുള്ളൂ. നിലവിൽ സംസ്ഥാനത്ത് വേനൽമഴ തുടരുകയാണ്. ഇന്ന് ആറ് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂർ എന്നീ ജില്ലകളിലാണ് ഇന്ന് ശക്തമായ മഴയ്ക്ക് സാധ്യതയുള്ളത്.
നേരത്തെ നൽകിയിരുന്ന മഴ മുന്നറിയിപ്പിൽ മാറ്റം വരുത്തിയിട്ടുണ്ടെന്നും, നാലിലധികം ജില്ലകളിലെ മുന്നറിയിപ്പ് പിൻവലിച്ചതായും കാലാവസ്ഥാ വകുപ്പ് വ്യക്തമാക്കി. മെയ് 27 വരെ സംസ്ഥാനത്ത് ഒറ്റപ്പെട്ട ശക്തമായ മഴ തുടരാൻ സാധ്യതയുണ്ട്. നാളെ നാല് ജില്ലകളിലും മറ്റന്നാൾ മൂന്ന് ജില്ലകളിലും മഴ മുന്നറിയിപ്പ് നൽകിയിട്ടുണ്ട്. കടൽ പ്രക്ഷുബ്ധമാകാൻ സാധ്യതയുള്ളതിനാൽ കേരള, കർണാടക, ലക്ഷദ്വീപ് തീരങ്ങളിൽ മത്സ്യബന്ധനത്തിന് വിലക്ക് ഏർപ്പെടുത്തിയിട്ടുണ്ട്.
