കൊച്ചി : നാദിര്ഷ സംവിധാനം ചെയ്യുന്ന ‘ഈശോ’ എന്ന സിനിമയ്ക്ക് പ്രദര്ശനാനുമതി നല്കരുതെന്നാവശ്യപ്പെട്ടുളള പൊതുതാല്പര്യ ഹര്ജി ഹൈകോടതി തളളി. ചീഫ് ജസ്റ്റിസ് അധ്യക്ഷനായ ബെഞ്ചിന്റേതാണ് നടപടി. സിനിമയ്ക്ക് ദൈവത്തിന്റെ പേര് ഇട്ടെന്ന് കരുതി കോടതിക്ക് ഇടപെടാനാകില്ലെന്ന് ഹൈക്കോടതി വ്യക്തമാക്കി. ക്രിസ്ത്യന് അസോസിയേഷന് ഫോര് സോഷ്യല് ആക്ഷന് ആണ് കോടതിയില് പൊതുതാല്പ്പര്യ ഹര്ജി നല്കിയത്. ഹര്ജിയ്ക്ക് നിലനില്പ്പില്ലെന്ന് വ്യക്തമാക്കിയാണ് ഹൈകോടതിയുടെ നടപടി.
ഈ ചിത്രത്തിന്റെ പേര് പ്രഖ്യാപിച്ചതിന് പിന്നാലെ ഒരു കൂട്ടം ആളുകള് സിനിമയുടെ പേര് മാറ്റണമെന്ന ആവശ്യവുമായി രംഗത്തു വന്നു. ഇക്കാര്യത്തില് പി.സി ജോര്ജ് അടക്കമുള്ള പ്രമുഖരും ഈശോ എന്ന പേരിനെതിരെ രംഗത്തുവന്നിരുന്നു. ഈശോ എന്ന പേരില് സിനിമ പുറത്തിറങ്ങിയാല് തിയേറ്ററുകളില് പ്രദര്ശിപ്പിക്കാന് അനുവദിക്കില്ലെന്ന് പി.സി ജോര്ജ് വ്യക്തമാക്കിയിരുന്നു. ഈ പേരില് സിനിമ ഇറക്കാമെന്ന് സംവിധായകന് നാദിര്ഷ വിചാരിക്കേണ്ടെന്നും പ്രത്യാഘാതങ്ങള് നേരിടേണ്ടി വരുമെന്നും പി.സി ജോര്ജ് മുന്നറിയിപ്പ് നല്കിയിരുന്നു.
സിനിമയില് നല്ല കാര്യങ്ങളാണ് പറയുന്നത് എങ്കിലും ഈശോ എന്ന പേര് ഉപയോഗിക്കാന് പാടില്ല എന്നാണ് കത്തോലിക്കാ കോണ്ഗ്രസ് നേതാക്കള് ചൂണ്ടിക്കാട്ടിയിരുന്നത്. നാദിര്ഷ സംവിധാനം ചെയ്യുന്ന, ജയസൂര്യ നായകനാകുന്ന സിനിമയാണ് ഈശോ.
