പത്തനംതിട്ട : പത്തനംതിട്ട ജനറല് ആശുപത്രിയിലെ ബി & സി ബ്ലോക്കിലെ ശുചി മുറിയുടെ പൈപ്പുകള് പൊട്ടിഒഴുകുന്നു. ആശുപത്രിയുടെ പുറകിലെ ഡോക്ടെഴ്സ് ലൈന് റോഡിന്റെ ഭാഗത്തായാണ് മലിന ജലം പുറത്തേക്ക് ഒഴുകുന്നത്. ഭിത്തിയില് കൂടി ശുചിമുറിയുടെ മലിന ജലം തുടര്ച്ചയായി വീണുതുടങ്ങിയതോടെ ഭിത്തികളില് പായലും കാടും വളര്ന്നിരിക്കുന്നതും കാണാം. ഒഴുകി ഇറങ്ങുന്ന മലിന ജലം മതിലിന് അപ്പുറത്താണ് വീഴുന്നത് എന്നതിനാല് തന്നെ ഇത് പെട്ടന്ന് ആരുടേയും കണ്ണില് പെടുകയുമില്ല. എന്നാല് ആശുപത്രിയിലേക്ക് എത്തുന്ന രോഗികള്ക്ക് ഇത് കൂടുതല് ഭീഷണിയാകുന്നുന്നുണ്ട്. ചികിത്സയ്ക്ക് എത്തുന്ന രോഗികള് പുതിയ രോഗവുമായി മടങ്ങി പോകേണ്ട അവസ്ഥയാണ് ഇപ്പോഴുള്ളത്.
കോവിഡ് കാലത്ത് തുടര്ച്ചയായി ക്ലോറിനേഷന് നടത്തിയത് കാരണം ബി ആന്ഡ് സി ബ്ലോക്കിന് ബലക്ഷയം ഉണ്ടായതായി പഠനത്തില് കണ്ടെത്തിയിരുന്നു. വെറും പതിനേഴ് വര്ഷം മാത്രം കാലപ്പഴക്കമുള്ള കെട്ടിടത്തില് ശുചിമുറിയുടെ ടൈലുകള്ക്ക് ഇടയില് കൂടിയും ചോര്ച്ച സംഭവിച്ചിട്ടുണ്ട്. ബലക്ഷയം കണ്ടെത്തിയിട്ടും ഇപ്പോഴും പ്രവര്ത്തിക്കുന്ന കെട്ടിടത്തില് മലിനജലം പൊട്ടിയ പൈപ്പുകള് വഴി പുറത്തേക്ക് ഒഴുകുന്നത് തടഞ്ഞില്ല എങ്കില് ഗുരുതര ആരോഗ്യ പ്രശ്നങ്ങള്ക്കും ഇത് വഴിവെക്കും.
