റാന്നി : പുനലൂർ – മൂവാറ്റുപുഴ സംസ്ഥാന പാതയിലെ ഏറ്റവും പ്രധാനപ്പെട്ട പാലങ്ങളിലൊന്നായ റാന്നി പാലത്തിൽ അടിയന്തിരമായി സുരക്ഷാ മുൻകരുതലുകൾ ഏർപ്പെടുത്തണമെന്ന് പൊതുജനങ്ങളുടെ ആവശ്യം ശക്തമാകുന്നു. പമ്പാനദിക്ക് കുറുകെയുള്ള ഈ പാലത്തിൽ നിന്ന് ആറ്റിലേക്ക് ചാടിയുള്ള അപകടങ്ങൾ വർധിക്കുന്ന സാഹചര്യത്തിലാണ് അടിയന്തിര ഇടപെടൽ വേണമെന്ന ആവശ്യവുമായി നാട്ടുകാരും വിവിധ സംഘടനകളും രംഗത്തെത്തിയിരിക്കുന്നത്. റാന്നിയുടെ ചരിത്രത്തോടും ശബരിമല തീർത്ഥാടന പാതയോടും ഏറെ ബന്ധമുള്ള ഈ പാലത്തിൽ സുരക്ഷാ വേലികളുടെ കുറവ് വലിയ പ്രതിസന്ധിയാണ് സൃഷ്ടിക്കുന്നത്. മുൻപ് പഴയ പാലം തകർന്നതും 2018 ലെയും 2026 ലെയും പ്രളയങ്ങളെ അതിജീവിച്ചതുമായ പാലത്തിന്റെ നിലവിലുള്ള കൈവരികൾക്ക് ഉയരം കുറവായതും അപകടസാധ്യത വർധിപ്പിക്കുന്നു.
പാലത്തിന്റെ ഇരുവശങ്ങളിലും കൂടുതൽ ഉയരമുള്ള സുരക്ഷാ വേലികളോ പ്രതിരോധ സംവിധാനങ്ങളോ ഉടൻ സ്ഥാപിക്കണം. പൊതുമരാമത്ത്, തദ്ദേശ സ്വയംഭരണ സ്ഥാപനങ്ങൾ, പോലീസ്, ജില്ലാ ഭരണകൂടം എന്നിവർ സംയുക്തമായി സ്ഥലപരിശോധന നടത്തി അടിയന്തിര സുരക്ഷാ പരിശോധന പൂർത്തിയാക്കണമെന്നും ആവശ്യമുയരുന്നു. പാലത്തിലും സമീപപ്രദേശങ്ങളിലും സി.സി.ടി.വി. ക്യാമറകൾ, കൃത്യമായ വെളിച്ചം, മുന്നറിയിപ്പ് ബോർഡുകൾ എന്നിവ സ്ഥാപിക്കണമെന്നും ജനങ്ങള്‍ പറയുന്നു. മരണങ്ങൾ സംഭവിച്ചതിന് ശേഷം നടപടിയെടുക്കുന്നതിന് പകരം ഒരു ജീവൻ പോലും നഷ്ടപ്പെടാതിരിക്കാനുള്ള മുൻകരുതലുകളാണ് ആവശ്യമെന്ന് നാട്ടുകാർ ചൂണ്ടിക്കാട്ടുന്നു.
