കോന്നി : അപകടകരമായ വളവുകളില് സുരക്ഷ ഒരുക്കുവാനായി പൊതുമരാമത്ത് റോഡ് വിഭാഗം കോന്നി എ.ഇ ഓഫീസ് പരിധിയില് കോന്നി താലൂക്കിലെ അഞ്ച് ഇടങ്ങളിലായി ക്രാഷ് ബാരിയരുകള് സ്ഥാപിക്കുന്ന ജോലികള് ആരംഭിച്ചു. അഞ്ച് റോഡുകളിലായി ക്രാഷ് ബാരിയറുകള് സ്ഥാപിക്കുവാന് 12.25 ലക്ഷം രൂപയാണ് അനുവദിച്ചിട്ടുള്ളത്. ഏറ്റവും കൂടുതല് അപകടകരമായ വളവുകളുള്ള ചാങ്കൂര്മുക്ക് – തണ്ണിത്തോട് മൂഴി വരെയുള്ള ഭാഗം, ചന്ദനപ്പള്ളി റോഡ്, വകയാര് – വള്ളിക്കോട് റോഡ്, അതിരുങ്കല് – കുളത്തുമണ്, കാഞ്ഞിരപ്പാറ റോഡ് എന്നിവടങ്ങളിലെ അപകടകരമായ വളവുകളില് ആണ് ക്രാഷ് ബാരിയറുകള് സ്ഥാപിക്കുന്ന നടപടികള് പുരോഗമിക്കുന്നത്.
ചാങ്കൂര് മുക്ക് മുതല് തണ്ണിത്തോട് മൂഴി വരെയുള്ള ഭാഗത്തെ അഞ്ചിടങ്ങളിലായാണ് ക്രാഷ് ബാരിയറുകള് സ്ഥാപിക്കുന്നത്. തുടര്ച്ചയായുള്ള വളവുകള് മൂലം ഈ റോഡില് ചെറുതും വലുതുമായ അപകടങ്ങള് നടന്നിരുന്നു. ഇതിന് പരിഹാരമായാണ് ക്രാഷ് ബാരിയറുകള് സ്ഥാപിക്കുന്നത്. എല്ലാ റോഡുകളും ചേര്ന്ന് 422 മീറ്റര് നീളത്തിലായാണ് ക്രാഷ് ബാരിയറുകള് സ്ഥാപിക്കുക. ഇത് സ്ഥാപിക്കപ്പെടുന്നതോടെ വലിയ അപകടങ്ങള് ഒഴിവാക്കാന് കഴിയുമെന്നാണ് അധികൃതര് പ്രതീക്ഷിക്കുന്നത്.
