പത്തനംതിട്ട : അങ്കണവാടികളിലെ പരിഷ്കരിച്ച മെനു നടപ്പിലാക്കുന്നതിന്റെ നഗരസഭാ തല ഉദ്ഘാടനം ചിറ്റൂർ 9 -ാം വാർഡിലെ സ്മാർട്ട് അങ്കണവാടിയിൽ മുനിസിപ്പൽ ചെയർമാൻ അഡ്വ. ടി സക്കീർ ഹുസൈൻ നിർവ്വഹിച്ചു. ആരോഗ്യമുള്ള തലമുറയെ വാർത്തെടുക്കുക എന്ന ലക്ഷ്യത്തോടെയാണ് സർക്കാർ അങ്കണവാടികളിലെ ഭക്ഷണ ക്രമത്തിൽ കാലോചിതമായ പരിഷ്കാരം നടപ്പിലാക്കുന്നത് എന്ന് അദ്ദേഹം പറഞ്ഞു. വാർഡ് കൗൺസിലർ എ. സാബു അധ്യക്ഷത വഹിച്ചു. ഐ സി ഡി എസ് സൂപ്പർവൈസർ നിഷ ആ നി ജോസഫ് മെനു പരിഷ്കരണത്തിന്റെ ലക്ഷ്യങ്ങൾ വിശദീകരിച്ചു.
96-ാം നമ്പർ അങ്കണവാടി വർക്കർ ജയ വി കെ, ഹെൽപ്പർ ലത പി ആർ എന്നിവർ പങ്കെടുത്തു. ശങ്കു എന്ന അങ്കണവാടി കുട്ടിയുടെ ആവശ്യം സാമൂഹ്യ മാധ്യമത്തിലൂടെ വലിയ ജനശ്രദ്ധ നേടിയിരുന്നു. സംസ്ഥാന സർക്കാർ നടത്തിയ ഇടപെടലിലൂടെ തൻ്റെ ആവശ്യം സാധിച്ചതിന്റെ സന്തോഷവും ഈ കുട്ടി പങ്കുവെച്ചിരുന്നു. എണ്ണയുടെയും പഞ്ചസാരയുടെയും ഉപ്പിന്റെയും ഉപയോഗം പരമാവധി കുറച്ചുള്ള ശാസ്ത്രീയ ഭക്ഷണ രീതിയാണ് മെനുവിൽ ഉൾപ്പെടുത്തിയിരിക്കുന്നത്.
