ചെങ്ങരൂർ : വഴിയാത്രക്കാരുടെയും സ്കൂൾ കുട്ടികളുടെയും ജീവന് ഭീഷണിയായി തെരുവു നായ്ക്കൂട്ടം. കല്ലൂപ്പാറ ഗ്രാമപഞ്ചായത്ത് 1-ാം വാർഡിൽ ചെങ്ങരൂർ ബിയഡ് കോളജ് മുതൽ ചെങ്ങരൂർ കവല വരെയാണ് നായകൾ കൂട്ടം കൂടി നടക്കുകയും വഴിയാത്രക്കാർക്ക് ബുദ്ധിമുട്ടുണ്ടാക്കുകയും ചെയ്യുന്നത്. ഇരുചക്ര വാഹനത്തിൽ പോകുന്നവരുടെ പുറകെ കുരച്ചു കൊണ്ട് ഓടുകയും നിയന്ത്രണം വിട്ട് വാഹനം അപകടത്തിൽപെടുകയും ചെയ്യുന്നത് പ്രദേശവാസികൾക്ക് സ്ഥിരം കാഴ്ച്ചയാണ്. കഴിഞ്ഞ ദിവസം പ്രദേശവാസിയായ വീട്ടുടമസ്ഥയുടെ വീട്ടിലേക്ക് തെരുവു നായ്കൾ കൂട്ടത്തോടെ എത്തുകയും വീട്ടുടമസ്ഥയെ ആക്രമിക്കുകയും ചെയ്തിരുന്നു.
ദിവസേന 500-ൽ അധികം സ്കൂൾ കുട്ടികൾ ബസ് കയറാൻ നിൽക്കുകയും കാൽനടയായി പോകുവാനും ഉപയോഗിക്കുന്ന റോഡാണ് ഇത്. ബസ് കാത്തുനില്ക്കുന്ന സ്കൂൾ കുട്ടികളുടെ അടുത്തേക്ക് തെരുവു നായ്കൾ കൂട്ടത്തോടെ വരുന്നതും കുട്ടികൾ പേടിച്ച് ഓടുന്നതും സ്ഥിരം കാഴ്ച്ചയാണ്. പല തവണ വാർഡ് മെമ്പറുടെയും കല്ലൂപ്പാറ ഗ്രാമപഞ്ചായത്ത് സെക്രട്ടറിയുടെയും ശ്രദ്ധയിൽപെടുത്തി എങ്കിലും യാതൊരു നടപടിയും അതികൃതരുടെ ഭാഗത്തുനിന്നും ഉണ്ടായിട്ടില്ല. ജനങ്ങളുടെ ജീവനും സ്വത്തിനും ഭീഷണിയായി നാട്ടിൽപുറങ്ങളിൽ വളരുന്ന തെരുവ് നായ്കളെ നിയന്ത്രിക്കുവാൻ ആവശ്യമായ നടപടികൾ ഉണ്ടാകണമെന്നാണ് നാട്ടുകാരുടെ ആവശ്യം.
