തിരുവനന്തപുരം : സംസ്ഥാനത്തെ പിഎസ്സി ഉദ്യോഗാർഥികൾക്ക് ആശ്വാസമായി റാങ്ക് ലിസ്റ്റുകളുടെ കാലാവധി നീട്ടാൻ പി എസ് സി യോഗം തീരുമാനിച്ചു. 2026 മെയ് 25 നും ഓഗസ്റ്റ് 31 നും ഇടയിൽ കാലാവധി അവസാനിക്കുന്ന റാങ്ക് ലിസ്റ്റുകളാണ് നവംബർ 30 വരെ നീട്ടിയത്. ഈ തീരുമാനം വഴി ഏകദേശം 289-ഓളം റാങ്ക് ലിസ്റ്റുകൾക്ക് കാലാവധി നീട്ടിക്കിട്ടും. ഇത് ഏകദേശം 30,845 ഉദ്യോഗാർഥികൾക്ക് വലിയ ആശ്വാസമാകുമെന്നാണ് വിവരം. പുതിയ സർക്കാർ അധികാരത്തിൽ വന്നതിനെത്തുടർന്ന് റാങ്ക് ലിസ്റ്റുകളുടെ കാലാവധി നീട്ടുന്നതുമായി ബന്ധപ്പെട്ട ശുപാർശ പി എസ് സിക്ക് നൽകിയിരുന്നു.
ഇന്ന് ചേർന്ന പി എസ് സി യോഗത്തിലാണ് ഈ ശുപാർശ ഔദ്യോഗികമായി അംഗീകരിച്ചത്. കാലാവധി നീട്ടണമെന്നാവശ്യപ്പെട്ട് മുൻപ് നിരവധി ഉദ്യോഗാർഥികൾ സെക്രട്ടറിയറ്റിന് മുന്നിൽ വലിയ രീതിയിൽ സമരം നടത്തിയിരുന്നു. ഉദ്യോഗാർഥികളുടെ ഈ ദീർഘനാളത്തെ ആവശ്യത്തിനാണ് ഇപ്പോൾ അംഗീകാരം ലഭിച്ചിരിക്കുന്നത്.
