തിരുവനന്തപുരം: കേരളം ഇനി അഞ്ചുവർഷത്തേക്ക് ആരുഭരിക്കുമെന്ന് അറിയാൻ മണിക്കൂറുകൾ മാത്രം. വോട്ടെടുപ്പ് കഴിഞ്ഞ് 25 ദിവസത്തെ ഉദ്വേഗം നിറഞ്ഞ കാത്തിരിപ്പിന് എട്ടുമണിയോടെ വിരാമമാകും. 10 വർഷത്തെ ഇടവേളയ്ക്ക് ശേഷം മികച്ച ഭൂരിപക്ഷത്തോടെ അധികാരത്തിൽ തിരിച്ചെത്താം എന്ന ആത്മവിശ്വാസത്തിലാണ് യുഡിഎഫ്. എക്സിറ്റ്പോൾ സൂചനകൾ തള്ളുന്ന എൽഡിഎഫ് നേരിയ ഭൂരിപക്ഷത്തിൽ മൂന്നാം പിണറായി സർക്കാർ അധികാരത്തിലെത്തുമെന്ന് ആത്മവിശ്വാസം പ്രകടിപ്പിക്കുന്നു. കേരളത്തിൽ നിർണ്ണായക ശക്തിയാവുക എന്ന എക്കാലത്തേയും ആഗ്രഹം ഇത്തവണ സാധ്യമാകുമെന്ന് ബിജെപിയും കരുതുന്നു. എങ്ങോട്ടേക്കും തിരിയാവുന്ന മുപ്പതിലേറെ മണ്ഡലങ്ങൾ ഉണ്ടെന്നതാണ് ഈ തെരഞ്ഞെടുപ്പ് പോരാട്ടത്തെ അങ്ങേയറ്റം ആശേവകരമാക്കിയത്.
യുഡിഎഫിന് ഫലം അനുകൂലമെങ്കില് ഹൈക്കമാന്ഡ് നിരീക്ഷകര് കേരളത്തിലെത്തും. നിയുക്ത എംഎല്എമാരുടെ പിന്തുണ തേടുന്നതടക്കം നടപടികള് വേഗത്തില് പൂര്ത്തിയാക്കാനാണ് നീക്കം. ഹൈക്കമാന്ഡ് പച്ചക്കൊടി കാട്ടിയാല് മുഖ്യമന്ത്രി പദത്തിലേക്ക് കെ.സി. വേണുഗോപാല് എത്തുമെന്ന് ചർച്ചയുണ്ട്. ആര് മുഖ്യമന്ത്രിയാകണമെന്ന് കോണ്ഗ്രസിന് തീരുമാനിക്കാമെന്ന് മുസ്ലീം ലീഗ് നേതാവ് മുനവറലി തങ്ങള് വ്യക്തമാക്കിയിട്ടുണ്ട്. കേരളത്തിലെ ഫലം എഐസിസിക്കും ഏറെ നിര്ണ്ണായകമാണ്. വോട്ടെണ്ണുന്ന സംസ്ഥാനങ്ങളില് ഹൈക്കമാന്ഡ് നേതൃത്വം പൂര്ണ്ണ വിജയ പ്രതീക്ഷ വച്ചു പുലര്ത്തുന്നത് കേരളത്തില് മാത്രമാണ്. 85നും 90 നുമിടയില് സീറ്റുകളാണ് എഐസിസിയുടെ പ്രതീക്ഷ. ഫലം അനുകൂലമെങ്കില് സര്ക്കാര് രൂപീകരണം വൈകേണ്ടതില്ലെന്നാണ് കണക്ക് കൂട്ടുന്നത്.
