ഒറ്റപ്പാലം : ബൈക്കിടിച്ച് വീണ പശുവിന്‍റെ കൊമ്പ് ശരീരത്തില്‍ തുളഞ്ഞുകയറി യുവാവ് മരിച്ചു. ബൈക്ക് യാത്രികനായിരുന്ന പനമണ്ണ കുഴിക്കാട്ടില്‍ കൃഷ്ണപ്രജിത്താണ് (22) മരിച്ചത്. വാഹനമിടിച്ച പശു സംഭവസ്ഥലത്തുതന്നെ ചത്തു. ശനിയാഴ്ച വൈകീട്ട് ഏഴരയോടെ വീട്ടാമ്പാറ-പനമണ്ണ റോഡിലായിരുന്നു അപകടം. ഉടമകള്‍ മേയ്ച്ചുകൊണ്ടുപോകുകയായിരുന്ന പശുവിനെ ഇടിച്ച് ബൈക്ക് നിയന്ത്രണംവിട്ട് മറിയുകയായിരുന്നുവെന്ന് പോലീസ് പറഞ്ഞു.
ബൈക്കില്‍നിന്ന് തെറിച്ചുവീണ യുവാവിന്‍റെ നെഞ്ചില്‍ പശുവിന്‍റെ കൊമ്പ് തുളഞ്ഞുകയറി. നാട്ടുകാര്‍ ചേര്‍ന്ന് കണ്ണിയംപുറത്തെ സ്വകാര്യ ആശുപത്രിയില്‍ എത്തിച്ചെങ്കിലും കൃഷ്ണപ്രജിത്തിനെ രക്ഷിക്കാനായില്ല. ഞായറാഴ്ച പോസ്റ്റ്‌മോര്‍ട്ടം നടത്തും. അച്ഛന്‍: കൃഷ്ണകുമാര്‍. അമ്മ: പരേതയായ പ്രീതകുമാരി. സഹോദരന്‍: കിഷോര്‍.
