കൊച്ചി : അമിത അളവില് ഗുളിക കഴിച്ച് ആത്മഹത്യയ്ക്ക് ശ്രമിച്ച യുവാവിന് പോലീസ് ഉദ്യോഗസ്ഥന്റെ സമയോചിത ഇടപെടലില് ജീവന് തിരിച്ചുകിട്ടി. ചേരാനല്ലൂര് പോലീസ് സ്റ്റേഷനിലെ സീനിയര് സിവില് പോലീസ് ഓഫീസര് മുഹമ്മദ് നസീറാണ് ഇടയക്കുന്നം സ്വദേശിയുടെ ജീവന് രക്ഷിച്ചത്. തന്റെ ഫോണിലേക്ക് പരിചയക്കാരന് അയച്ച സന്ദേശത്തിന്റെ ചുവടുപിടിച്ച് മുഹമ്മദ് നസീര് നടത്തിയ ഇടപെടലാണ് ഒരു ജീവന് തുണയായത്. ഞായറാഴ്ച വൈകുന്നേരം മൂന്നോടെയാണ് മുഹമ്മദ് നസീറിന്റെ ഫോണിലേക്ക് പരിചയക്കാരന്റെ സന്ദേശം എത്തിയത്. അദ്ദേഹത്തിന്റെ സുഹൃത്ത് അയച്ച മെസേജില് ആത്മഹത്യ ചെയ്യാന് പോകുന്നുവെന്ന സൂചനയുണ്ടായിരുന്നു. സന്ദേശം കിട്ടിയ ഉടന് മുഹമ്മദ് നസീര് സൈബര് സെല്ലുമായി ബന്ധപ്പെട്ട് യുവാവിന്റെ ലൊക്കേഷന് കണ്ടെത്താന് ശ്രമിച്ചെങ്കിലും ഫോണ് സ്വിച്ച് ഓഫ് ആയിരുന്നു.
തുടര്ന്ന് ഇയാളുടെ വിലാസം കണ്ടെത്തി ചേരാനല്ലൂര് എസ്ഐമാരായ കെ.എക്സ്. തോമസ്, സാബു എന്നിവര്ക്കൊപ്പം യുവാവിന്റെവീട്ടിലെത്തി. ഇരുനില വീട്ടില് താഴത്തെ നിലയിലെ വാതില് തുറന്നുകിടക്കുന്നതു കണ്ട് പോലീസ് സംഘം മുറിയില് പ്രവേശിച്ചെങ്കിലും ആരെയും കണ്ടില്ല. ഈ സമയം യുവാവിന്റെ ഭാര്യയും കുഞ്ഞും അവരുടെ വീട്ടില് പോയിരിക്കുകയായിരുന്നു.
