പട്‌ന (ബിഹാര്‍) : പ്രണയബന്ധത്തിന്റെ പേരില്‍ യുവാവിനെ പെണ്‍കുട്ടിയുടെ ബന്ധുക്കള്‍ ചേര്‍ന്ന് ഓടുന്ന ബസിനടിയിലേക്ക് എറിഞ്ഞുകൊന്നു. റൗഷന്‍ കുമാര്‍ (25) എന്നയാള്‍ സംഭവസ്ഥലത്ത് വെച്ച് തന്നെ മരിച്ചു. വെള്ളിയാഴ്ച വൈകുന്നേരം ബിഹാറിലെ മുഫാഫര്‍പുറിലാണ് സംഭവം. സംഭവവുമായി ബന്ധപ്പെട്ട് മൂന്ന് പേരെ പോലീസ് അറസ്റ്റ് ചെയ്തു.
കത്താറ ഗ്രാമത്തില്‍നിന്നുള്ള റൗഷന്‍ കുമാര്‍ ഗ്രാമത്തിലെ തന്നെ ഒരു പെണ്‍കുട്ടിയുമായി പ്രണയത്തിലായിരുന്നു. ഇരുവരും ഒരേ സമുദായത്തില്‍പ്പെടുന്നവരും അകന്ന ബന്ധുക്കളുമായിരുന്നിട്ടും പെണ്‍കുട്ടിയുടെ കുടുംബം ബന്ധത്തെ എതിര്‍ത്തു. വിവാഹത്തിന് വീട്ടുകാര്‍ സമ്മതിക്കാതിരുന്നതോടെ ഇതോടെ ഇരുവരും ഗ്രാമത്തില്‍നിന്ന് ഒളിച്ചോടുകയായിരുന്നു. വെള്ളിയാഴ്ച ഹാജിപുരില്‍ ഇരുവരേയും കണ്ടെത്തിയ പെണ്‍കുട്ടിയുടെ കുടുംബം ഇവരെ അനുനയിപ്പിച്ച് ഗ്രാമത്തിലേക്ക് കൊണ്ടവരികയായിരുന്നു.
മുസാഫിര്‍നഗറിലെത്തിയപ്പോള്‍ ഇവര്‍ സഞ്ചരിച്ചിരുന്ന വാഹനത്തില്‍ നിന്ന് പുറത്തിറങ്ങാന്‍ റൗഷനോട് ആവശ്യപ്പെട്ടു. വണ്ടിയില്‍ നിന്ന് ഇറങ്ങിയ യുവാവിനെ പെണ്‍കുട്ടിയുടെ രണ്ട് ബന്ധുക്കള്‍ ചേര്‍ന്ന് അടുത്തുള്ള തിരക്കുള്ള ജംഗ്ഷനിലേക്ക് കൊണ്ടുപോകുകയും റോഡ് മുറിച്ചു കടക്കാന്‍ സഹായിക്കാനെന്ന വ്യാജേന പിന്നില്‍ നിന്ന ഇവര്‍ യുവാവിനെ ഓടുന്ന ബസിന്റെ മുന്നിലേക്ക് തള്ളിയിടുകയായിരുന്നു. യുവാവ് സംഭവ സ്ഥലത്തുവെച്ചുതന്നെ മരണപ്പെട്ടു.
