കളമശ്ശേരി: പുലര്ച്ച ഹോസ്റ്റലുകളില്നിന്ന് മോഷണം നടത്തി വന്ന പ്രതികള് കളമശ്ശേരി പോലീസിന്റെ പിടിയിലായി. മലപ്പുറം അരീക്കോട് സ്വദേശി ചായോട്ടില് വീട്ടില് ജലാലുദ്ദീന് (24), ഇടുക്കി പീരുമേട്, സ്വദേശി അജയ്( 22), പ്രായപൂര്ത്തിയാകാത്ത മറ്റൊരാളും ഉള്പ്പെടെ മൂന്നുപേരാണ് പിടിയിലായത്. ഹോസ്റ്റലുകള്, ബാച്ചിലേഴ്സ് താമസിക്കുന്ന മുറികള് എന്നിവിടങ്ങളില്നിന്ന് മൊബൈല് ഫോണ്, ഡിജിറ്റല് കാമറ, പഴ്സ് എന്നിവയാണ് പ്രതികള് മോഷ്ടിച്ചത്. മയക്കുമരുന്നിന് അടിമയായ പ്രതികള് പുലര്ച്ച വാഹനത്തില് കറങ്ങുകയും ശ്രദ്ധയില്പെടുന്ന കെട്ടിടങ്ങളില് കയറി പരിശോധിച്ച് കയറാന് സൗകര്യപ്രദമായ ഇടമാണെങ്കില് മോഷണം നടത്തുകയുമാണ് ചെയ്യുന്നതെന്ന് പോലീസ് പറഞ്ഞു.
രണ്ടാഴ്ച മുമ്പ് കളമശ്ശേരിയില് ഹോട്ടലിലെ തൊഴിലാളികള് താമസിച്ചുവരുന്ന കെട്ടിടത്തില് കയറി മൊബൈല് ഫോണ് മോഷ്ടിച്ചത് പ്രതികള് സമ്മതിച്ചു. തോപ്പുംപടി ഭാഗത്തുനിന്ന് മൊബൈല് ഫോണും സ്വര്ണമാലയും 13,000 രൂപയും മോഷ്ടിച്ചതായും കൂനംതൈ ഭാഗത്തുനിന്ന് ബാഗ് മോഷ്ടിച്ചതായും കുസാറ്റ് ഭാഗത്തുനിന്ന് കാമറ മോഷ്ടിച്ചതും ഇവരാണെന്ന് പോലീസ് പറഞ്ഞു. മൊബൈല് ഫോണുകള് ലഹരി മരുന്ന് വാങ്ങാനായി പകരം കൊടുക്കുകയാണ് ചെയ്യുന്നത്. മൊബൈല് വിറ്റതുമായി ബന്ധപ്പെട്ട് ഏതെങ്കിലും ഷോപ്പ് ഉടമകള്ക്ക് പങ്കുണ്ടോയെന്നും കേസില് മറ്റു പ്രതികള് ഉള്പ്പെട്ടിട്ടുണ്ടോയെന്നും അന്വേഷിച്ചുവരുകയാണ്. സി.ഐ പി.ആര്. സന്തോഷിന്റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.
