ചെന്നൈ: കാമുകിക്ക് കാര് വാങ്ങുന്നതിനായി സ്വന്തം ഭാര്യയുടെ ആഭരണങ്ങള് കവര്ന്ന യുവാവ് അറസ്റ്റിലായി. ചെന്നൈയിലാണ് സംഭവം. പൂനമല്ലിയില് താമസിക്കുന്ന 40 കാരനായ ശേഖര് ആണ് അറസ്റ്റിലായത്. ദാമ്പത്യബന്ധത്തിലെ അസ്വാരസ്യങ്ങളെത്തുടര്ന്ന് രണ്ടു വര്ഷം മുമ്പ് ശേഖറിന്റെ ഭാര്യ സ്വന്തം വീട്ടിലേക്ക് പോയിരുന്നു.
അടുത്തിടെ ഭര്തൃവീട്ടിലെ ഷെല്ഫില് സൂക്ഷിച്ചിരുന്ന സ്വര്ണമെടുക്കുന്നതിനായി പൂനമല്ലിയിലെ വീട്ടിലെത്തിയപ്പോഴാണ് സ്വര്ണം കാണാനില്ലെന്ന് മനസ്സിലായത്. മുന്നൂറു പവന് സ്വര്ണമായിരുന്നു ഷെല്ഫില് സൂക്ഷിച്ചിരുന്നത്. ഇതില് 200 പവന് സ്വര്ണമാണ് കാണാനില്ലാതിരുന്നത്. തുടര്ന്ന് യുവതി സ്വര്ണം മോഷണം പോയതായി കാണിച്ച് പോലീസില് പരാതി നല്കി.
എന്നാല് സ്വര്ണത്തെക്കുറിച്ച് തനിക്ക് അറിയില്ലെന്നാണ് ശേഖര് പോലീസിന് മൊഴി നല്കിയത്. എന്നാല് ഇതു വിശ്വസിക്കാതിരുന്ന പോലീസ് നടത്തിയ വിശദമായ ചോദ്യം ചെയ്യലിലാണ് സ്വര്ണം എടുത്തതായി ശേഖര് സമ്മതിച്ചത്. ഭാര്യ പിണങ്ങിപ്പോയതിനെത്തുടര്ന്ന് സ്വാതി എന്ന 22 കാരിയുമായി ശേഖര് പ്രണയത്തിലായി. വീട്ടിലെ ഷെല്ഫില് സൂക്ഷിച്ചിരുന്ന ഭാര്യയുടെ സ്വര്ണം വിറ്റ് കാമുകിക്ക് കാര് വാങ്ങി നല്കിയതായും ശേഖര് പോലീസിനോട് പറഞ്ഞു.
