നേമം : നേമം നിയോജക മണ്ഡലത്തിൽ യുഡിഎഫ് മികച്ച വിജയം നേടുമെന്ന ഉറച്ച ആത്മവിശ്വാസത്തിൽ സ്ഥാനാർത്ഥി കെ.എസ്. ശബരിനാഥൻ. മണ്ഡലത്തിന്റെ എല്ലാ ഭാഗങ്ങളിൽ നിന്നും അനുകൂലമായ വോട്ടിംഗ് പാറ്റേൺ ഉണ്ടാകുമെന്നും യുഡിഎഫ് ഭരണത്തിലേക്ക് വരുമെന്നും അദ്ദേഹം വ്യക്തമാക്കി. പത്ത് വർഷത്തെ എൽഡിഎഫ് സർക്കാരിന്റെ ഭരണത്തിൽ മാറ്റം വരണമെന്ന് ജനങ്ങൾ ആഗ്രഹിക്കുന്നു. വരുംതലമുറയുടെ ഭാവിക്കായി ഒരു വികസന കാഴ്ചപ്പാടുള്ള ഭരണം യുഡിഎഫിന് മാത്രമേ നൽകാൻ കഴിയൂ എന്ന വിശ്വാസം ജനങ്ങൾക്കിടയിലുണ്ട്. ബിജെപിയുടെ രാഷ്ട്രീയം ജനങ്ങൾ മടുത്തു കഴിഞ്ഞു. തിരുവനന്തപുരം കോർപ്പറേഷനിലെ കഴിഞ്ഞ 50 ദിവസത്തെ പ്രവർത്തനം കണ്ടപ്പോൾ തന്നെ അവരെക്കൊണ്ട് ഒന്നിനും കൊള്ളില്ല എന്ന് ജനങ്ങൾക്ക് മനസ്സിലായിക്കഴിഞ്ഞു. ബിജെപി പരാജയപ്പെടണമെന്നത് ജനങ്ങളുടെ പൊതുവായ ആഗ്രഹമാണ് എന്നും അദ്ദേഹം പറഞ്ഞു.
നേമത്തിന്റെ മതനിരപേക്ഷമായ അന്തരീക്ഷം നിലനിൽക്കണമെങ്കിൽ അത് യുഡിഎഫിലൂടെ മാത്രമേ സാധിക്കൂ എന്ന് വോട്ടർമാർ തിരിച്ചറിയുന്നു. മുൻപ് സംഭവിച്ച തെറ്റുകൾ തിരുത്തിക്കൊണ്ട് ജനങ്ങൾ ഇത്തവണ യുഡിഎഫിന് വോട്ട് ചെയ്യുമെന്ന് അദ്ദേഹം പറഞ്ഞു. മറ്റ് സ്ഥാനാർത്ഥികളെ അപേക്ഷിച്ച് മണ്ഡലത്തിന്റെ എല്ലാ കോണുകളിലും ഓടിയെത്താൻ തനിക്ക് സാധിച്ചിട്ടുണ്ട്. വലിയ സാമ്പത്തിക കരുത്തിനേക്കാൾ ഉപരിയായി, പാർട്ടിക്കുള്ളിലെ മികച്ച ടീം വർക്കും താഴെത്തട്ടിലുള്ള പ്രവർത്തനങ്ങളുമാണ് വിജയപ്രതീക്ഷ നൽകുന്നത് എന്നും അദ്ദേഹം അഭിപ്രായപ്പെട്ടു.
