തിരുവല്ല : പത്തനംതിട്ട ജില്ലയിലെ വിവിധ പ്രദേശങ്ങളില് മഴയ്ക്ക് നേരിയ ശമനമുണ്ടെങ്കിലും തിരുവല്ല അപ്പര് കുട്ടനാടിന്റെ വിവിധ മേഖലകളില് ഇപ്പോഴും വെള്ളം ഇറങ്ങിയിട്ടില്ല. കുറ്റൂര്, പെരിങ്ങര, നെടുംമ്പ്രം, നിരണം, കടപ്ര, തിരുവല്ല നഗര സഭയിലെ താഴ്ന്ന പ്രദേശങ്ങള് എന്നിവടങ്ങളില് നൂറുകണക്കിന് വീടുകള് ഒറ്റപ്പെട്ട നിലയിലാണ്. കഴിഞ്ഞ രാത്രി നിര്ത്താതെ പെയ്ത കനത്ത മഴയെ തുടര്ന്ന് ഈ മേഖലയിലെ നിരവധി കുടുംബങ്ങളെ ദുരിതാശ്വാസ കേന്ദ്രങ്ങളിലേക്കും സുരക്ഷിത സ്ഥാനങ്ങളിലേക്കും മാറ്റിയിട്ടുണ്ട്.
പുലര്ച്ചെയോടെ മഴയ്ക്ക് അല്പം ശമനമുണ്ടായിട്ടുണ്ടെങ്കിലും പല പ്രദേശങ്ങളിലും വ്യാപാര സ്ഥാപനങ്ങളും വീടുകളും അടക്കം വെള്ളത്തിലാണ്. പലയിടത്തും വീടുകളിലും വ്യാപാര സ്ഥാപനങ്ങളിലും ഉള്പ്പടെ വെള്ളം കയറിയതിനെ തുടര്ന്ന് ലക്ഷങ്ങളുടെ നാശനഷ്ടമാണ് ഉണ്ടായിട്ടുള്ളത്. നിലവിലുണ്ടായ നാശനഷ്ടങ്ങളുടെ കണക്കുകള് ബന്ധപ്പെട്ട അധികൃതര് ശേഖരിച്ച് വരുന്നതേയുള്ളൂ. അപ്പര് കുട്ടനാടന് മേഖലയിലെ റോഡുകളില് ഇപ്പോഴും വെള്ളം ഇറങ്ങി തുടങ്ങിയിട്ടില്ല. പ്രദേശത്തെ കിണറുകള് അടക്കം വെള്ളത്തില് മുങ്ങിയതോടെ രൂക്ഷമായ കുടിവെള്ള ക്ഷാമവും പലയിടത്തും നേരിടുന്നുണ്ട്.
