തിരുവനന്തപുരം : മന്ത്രി സജി ചെറിയാന് കെ – റെയില് അലൈന്മെന്റില് മാറ്റം വരുത്തിയെന്ന ആരോപണവുമായി കോണ്ഗ്രസ് നേതാവ് തിരുവഞ്ചൂര് രാധാകൃഷ്ണന്. ഒരു മന്ത്രിയുടെ പ്രദേശത്ത് കൂടി പോകുന്ന കെ – റെയില് അലൈന്മെന്റില് മാറ്റം വരുത്തിയെന്ന ആരോപണവുമായി നേരത്തെ തന്നെ തിരുവഞ്ചൂര് രംഗത്തെത്തിയിരുന്നു. എന്നാല് മന്ത്രിയുടെ പേരുവ്യക്തമാക്കി യിരുന്നില്ല. മന്ത്രി ഇനി വാ തുറന്നാല് ബാക്കി കാര്യങ്ങള് വ്യക്തമാക്കുമെന്നും തിരുവഞ്ചൂര് രാധാകൃഷ്ണന് മുന്നറിയിപ്പു നല്കി. ഇക്കാര്യം നേരിട്ട് അറിയാം. ആരോപണം തെറ്റാണെങ്കില് കെ – റെയില് ഉദ്യോഗസ്ഥര് തന്നെ പറയട്ടെയെന്നും തെളിവുകള് ഹാജരാക്കാമെന്നും തിരുവഞ്ചൂര് കൂട്ടിച്ചേര്ത്തു.
മന്ത്രിയ്ക്ക് താല്പര്യമുള്ള ആളുകളെ ബാധിക്കാതിരിക്കാനാണ് അലൈന്മെന്റില് മാറ്റം വരുത്തിയത്. കേരളത്തിലുടനീളം ഇത്തരത്തിലുള്ള സംഭവമുണ്ടായിട്ടുണ്ടെന്നും തിരുവഞ്ചൂര് ഉന്നയിക്കുന്നു. താല്പ്പര്യമുള്ള ആളുകള്ക്ക് അലൈന്മെന്റ് മാറ്റിയും മറിച്ചും മറ്റുള്ളവരുടെ തലയിലേക്ക് വെച്ചുകൊടുത്തിട്ടുണ്ടെന്നും ഇത് തന്നെയാണ് ജനങ്ങളുടെ വിഷമമെന്നും റവന്യൂ നിയമങ്ങള് ജനങ്ങള്ക്ക് അറിയില്ലായെന്നത് സര്ക്കാര് മുതലെടുക്കുകയാണെന്നും അദ്ദേഹം പറഞ്ഞു.
